Parlamentario Edgard Vrolijk (MEP):
Pabien grandi na Gabinete Wever-Croes II en especial Minister Endy Croes y su ekipo
Awe ta un gran dia pa e mundo deportivo, unda cu despues di 11 aña base di negosacion y trato husto, ta logra cu e contracto entre Fundacion Lotto pa Deporte (FLPD) y Candian Bank Notes (CBN) por a ser renegosha na beneficio di e deportista. Un contracto cu hamas mester a ser cambia pero cu a ser cambia na 2011 cu no tabatin beneficio pa Pais Aruba principalmente nos atletanan.
Periodo di masacre deportivo di 2011-2020
Aruba den e periodo di cambio aki haci bao maneho di ex Minister Mike de Meza a percura pa CBN a haya 104 miyon florin y FLDP a haya 34 miyon florin. Un situacion totalmente for di balans y cu no ta e motibo pakico FLPD a ser funda, unda cu e intencion ta pa e placa ser inverti den deporte. Den e periodo aki deporte y deportistanan a ser neglisha pa motibo cu no ta resta fondo pa inverti den nan. Nos por a wak dos stadion di futbol desaproba cu consecuencia cu nos seleccion nacional tin di hunga den exterior, nos por wak den ki estado luznan deportivo ta ya cu e ultimo mantencion ta data di 2008 y asina por sigui menciona den ki mal estado infrastructura deportivo a ser laga atras door di Gabinete Mike Eman 1 y 2. Tur esaki ta danki na e contract di 2011 sera door di ex Minister Mike de Meza. Den e periodo aki si por indica un proyecto por bisa ta e finalisacion di renobacion di Joe Laveist pero mas cu esaki nos no por haya paso si cada cuidadano core rond lo wak den ki estado nos infrastrcutura deportivonan ta.
Periodo di bonansa 2001-2009
Periodo di Gabinete Nelson Oduber IV bao guia di ex Minister Ramon Lee, Aruba a conoce e miho añanan di deporte. Den e periodo aki a conoce construccion di Stadion Frans Figaroa, Technical Center Angel Botta, Parke Jaburibari, Compleho Simon Antonio, Compleho Yara hunto cu veld di yerba artificial, Stadion Nadi Croes/Crismo Angela, dos veld di Little League na Pos Chikito, renobacion di Parke Recreativo na Esso Heights, drecha lusnan di mayoria veld na Aruba sin conta construccion di varios Gymzaal na Aruba y sin lubida cambio di e yerba artificial na 2008 di Stadion Guillermo Prospero Trinidad. Cu e ehempelnan claro asina mi kier a ilustra cuanto deporte a perde cu cambionan haci na 2011 door di sr Mike de Meza y AVP. A pone un paro total na desaroyo di deporte y deportistanan. Pero awe nos ta sera e capitulo amargo aki y ta habri un capitulo nobo yena cu hopi optimism, desaroyo y un speransa pa deporte y deportistanan.
Mi ta termina pa felicita Minister Endy Croes pa e logro importante, impactante y historico aki unda pa 2023 deporte y deportistanan por cuminsa piki e frutonan di e logro aki. Na tur futuro politico y tambe na pueblo en general, e ta nos tarea pa percura cu nunca mas un politico masacra deporte di e forma aki. Cua Gobierno cu por bin hamas por ser permiti pa perhudica nos deporte y deportistanan manera a pasa bao di Gabinete Mike Eman 1 y 2.
