E artista Arubano Reno Steba a ricibi na nomber di Fundacion Mi Cutisa un reconocimento special.
Tawata durante di e celebracion di dia di Rey 2022 na Museo Cas Tan Tin, cu e directiva representa pa presidente Arthur Kelly y secretario Addonsito Croes a sorprende Reno Steba cu un plakkaat special di glas cu palabranan di felicitacion y gradicimento riba dje graba. Esaki tawata pa su mas cu 35 añanan den e mundo farandulero tanto na Aruba como na Hulanda.
Tawata despues cu Reno Steba y su trio consistiendo di Chris Kross y Jeremy Bonarriba a toca algun piesa den ritmonan di Jazz Latino, cu Addonsito a cuminsa conta den corto e biografia aki sorprendiendo y yamando Reno Steba pa ricibi su plakkaat. Presidente di Mi Cutisa, Arthur Kelly a haci entrega di e plakkaat, felicitando y gradiciendo Reno pa su trayectoria grandi cu e tin.
Reno a declara di ta sumamente gradicido y di no a spera e reconocimento aki. Nunca tawata su intencion di ricibi honra pa su pasion. Tambe el a declara cu esaki ta un stimulo pa e sigui brinda su pueblo mucho mas ainda di su talento y pasion.
