Loke a cuminsa cu e ultimo deseo di un señora, awo a crece bira un iniciativa mas amplio cu ta pidi atencion pa medicamentonan di dolor y cuido paliativo na Aruba. E meta prinsipal ta pa garantisa cu personanan den nan ultimo fase di bida por pasa e dianan aki na un manera humano, digno y sin dolor den nan propio hogar.
Recientemente, Fundashon Ultimo Deseo Aruba (FUDA) a bin den contacto cu un situacion caminda un pashent terminal tabata desea di pasa su ultimo dianan di bida na cas, rondona pa su sernan keri. Durante e trayecto aki, a bira bin dilanti cu tin varios pregunta y bottlenecks rond di e bezogheidnan pa un medicamento di dolor adecuá fuera di hospital.
Despues di e caso aki, profesionalnan comprometi for di diferente disciplina a uni forsa. Awo a forma un grupo di proyecto multidisciplinario cu ta consisti di representantenan di, entre otro, cuido di dokter di cas, cuido farmaceutico, cuido na cas (thuiszorg), cuido geriatrico, servicio huridico, organisacionnan social y iniciativanan di boluntario.
Un base hancho pa investigacion
E grupo di proyecto a tene algun reunion caba y a constata cu tin un base hancho di sostento pa sigui investiga e bezogheidnan pa un medicamento di dolor humano y accesibel den e situacion na cas.
E punto di partida di e grupo di proyecto ta simpel: personanan cu ta scoge pa pasa nan ultimo fase di bida na cas, mester por conta na un cuido apropia, comfort, tranquilidad y un medicamento di dolor optimal.
Reunionnan formal den preparacion
Den e proximo periodo, e grupo lo pidi reunion cu diferente instancia y organisacion cu ta envolvi den e cuido di salud na Aruba. E obhetivo di esaki ta pa investiga conhuntamente cua ta e metodo cu tin pa sigui mehora e cuido pa personanan den nan ultimo fase di bida.
E grupo di proyecto ta enfatisa cu esaki no ta un discucion tocante casonan individual, sino un cuestion social cu por toca cualkier famia na Aruba na un dado momento.
“Nos ta di opinion cu un sociedad ta wordo marca tambe pa e manera con e ta trata su habitantenan mas vulnerabel. Hustamente den e ultimo fase di bida, hende merece comfort, dignidad y e cuido pa, si nan ta desea eso, ta na cas cerca nan sernan keri.”
Actualmente ta preparando e prome combersacionnan cu e partidonan envolvi. E grupo di proyecto ta expresa e speransa cu e cooperacion entre gobierno, instancianan di cuido, proveedornan di cuido y AZV por conduce na un desaroyo mas leu di cuido paliativo y medicamento di dolor na Aruba.
