Na caminda pa e Common Good Conference, un reunion importante a tuma luga recientemente entre representantenan di diferente fundacion local y Gobierno di Aruba. E encuentro tabata destina pa comparti mas informacion riba e evento, intercambia idea y ricibi feedback directo for di e sector comunitario.
Durante e reunion, fundacionnan cu ta traha diariamente pa e bon comun a haya espacio pa presenta nan experencia, reto y sugerencianan, cu meta pa fortalece colaboracion entre gobierno y comunidad. E dialogo tabata enfoca riba con e Common Good Conference y Expo por sirbi como un plataforma efectivo pa conecta iniciativa, comparti conocemento y genera impacto duradero pa Aruba.
Gobierno a duna un overview di e programa y obhetivo di e evento, subrayando riba e importancia di participacion activo di fundacion- y organisacionnan comunitario. E feedback ricibi lo incorpora den e desaroyo final di e conferencia, pa asina garantisa cu e evento ta responde na necesidad real di comunidad.
E fundacionnan presente a expresa nan aprecio pa e oportunidad pa participa den e proceso preparatorio y pa contribui cu nan perspectiva. Segun varios representante, e reunion a reenforsa e idea cu e bon comun no por construi sin colaboracion estrecho entre gobierno, sector social y comunidad.
E encuentro a conclui cu un yamada pa sigui dialogo y cooperacion, mirando e Common Good Conference como un paso importante den un proceso continuo pa construi un Aruba mas solidario, inclusivo y resiliente, basa riba responsabilidad comparti y participacion activo di tur sector.
