Fundashon Stimami Sterilisami a ricibi un donacion generoso di $8,000 di un non-profit organization Mericano yama One Love Foundation. E donacion lo yuda Stimami Sterilisami continua cu su campaña nacional di sterilisacion. Den e ultimo dos luna Fundashon Stimami Sterilisami a ricibi mas di 2,300 registracion y a subsidia 28,592 sterilisacion entre 2016 y Februari di e aña aki. E donacion di One Love lo wordo duplica Dollar pa Dollar door di Bucuti & Tara Beach Resort, un otro donador generoso, y hunto nan lo cubri 500 sterilisacion di cacho y pushi adicional.
“Nos ta sumamente agradecido na Ellen Sirianni, Berkley Cameron, y e team completo di One Love Foundation pa nan contribucion generoso y tur e ayudo cu nan ta dunando na Stimami Sterilisami. E ta conmovedor pa wak e esfuerso cu nan ta haciendo pa yuda nos y Aruba pa continua cu nos mision pa mitiga e sufrimento y abandono di nos animalnan – y nan ta haciendo tur esaki desde Merca!” Ewald Biemans, Presidente di Fundashon Stimami Sterilisami y doño/CEO di Bucuti & Tara Beach Resort, ta splica.
“Desde cu nos a cuminsa dos aña pasa, nos a traha duro pa cambia e bida nan di Aruba su animalnan bandona door di yuda organisacionnan di rescate proporciona cuminda, cuido medico, refugio, materialnan medico y sterilisacion. Pero nos a ripara cu nos mester sterilisacion na un escala masal pa nos por berdaderamente yuda e organisacionnan di rescate paso e ta e unico cos ta ataca e raiz di e problema y ta evita pa e number di bestianan di caya sigui aumenta. Nos ta trahando duro pa por continua apoya Fundashon Stimami Sterilisami pa nos por sterilisa mas cacho y pushi posibel,” Ellen Sirianni, Presidente di One Love Foundation, ta conta.
Pack For A Purpose Program
Ademas di e gran donacion di $8,000, pa e di dos biaha e aña aki, e directiva di One Love Foundation a trece regalo y materialnan necesario na Bucuti & Tara Beach Resort pa nan programa Pack For A Purpose cu ta apoya Imeldahof.
Pack For A Purpose ta un organisacion internacional cu tin como su mision pa trece un impacto positivo na comunidadnan mundialemente door di yuda biaheronan cu kier haci un contribucion significativo na e destinacionnan cu nan ta bishita. Bucuti & Tara Beach Resort ta orguyoso di ta un miembro di Pack For A Purpose desde Augustus 2015 y ta haci donacionnan cu un averahe di 423 kilo pa aña danki na su huespednan y otro donadornan.
“Como protectornan di animal, nos semper ta busca maneranan pa ‘maximalisa nos impacto’. Den e mes un pensamento, nos a realisa cu maximalisando nos impacto tawata un oportunidad pa apoya otro organisacionnan durante nos biahenan. Nos investigacion a trece nos na Pack for a Purpose. Nos ta sinti cu ta crucial pa apoya e muchanan den necesidad. Muchanan ta nos futuro y educacion ta fundamental. Nos mester siña nan pa por ta defensornan di nan mes y di bestia. Nos a dicidi di trece tasnan cu materialnan na Bucuti & Tara Beach Resort cu ta apoya Imeldahof cu nan programa” Cassie Murvay, un di e Directoranan di One Love Foundation, ta conta.
Abo tambe por haci un diferencia
Fundashon Stimami Sterilisami ta un non-profit organization cu ta uza 100% di tur donacion pa ofrece subsidio parcial pa e procedura di sterilisacion pa tanto publico en general, como tambe organisacionnan di boluntario cu ta cuida bestianan di cas of riba caya. E organisacion su bukinan ta habri y ta wordo controla pa asina brinda transparencia total di e uzo di fondonan. Pa esnan cu kier aporta na e gran causa aki, por haci donacion directo na Fundashon Stimami Sterilisami:
Banco: Aruba Bank
# di Cuenta: 6012630190
Nomber di cuenta: FUNDASHON STIMAMI STERILISAMI
Swift code: ARUBAWAX
