Como parti di su compromiso pa un dialogo habri y continuo cu e diferente comunidadnan riba nos isla, recientemente partido FUTURO a organisa un encuentro cu miembronan di e comunidad Hindu.
E reunion a brinda un oportunidad valioso pa e grupo aki expresa nan pensamento, preocupacion y sugerencia directamente cu e lidernan di e partido, mescos cu haya contesta na pregunta den un esfera cu ta fomenta transparencia y cooperacion.
Durante e sesion, a cubri temanan di gran importancia pa e comunidad Hindu na Aruba, enfoca principalmente riba e medidanan fiscal, e costo halto di haci negoshi y e eficiencia di e departamentonan publico.
Croes y Wever a scucha atentamente na cada un di e preocupacionnan aki y a comparti e propuestanan cu e partido tin prepara y ta orienta na genera un ambiente economico mas accesibel y funcional.
“Ta fundamental pa FUTURO compronde y atende cu e realidad di tur e comunidadnan na Aruba,” asina Gerlien Croes a expresa. “Nos sa cu e costo di haci negoshi y e eficiencia di aparato publico ta temanan cu ta afecta hopi sector, y nos ta comprometi pa traha riba solucionnan cu ta haci nos economia mas husto y accesibel pa tur.”
Di su banda, Geoffrey Wever a destaca e importancia di acerca comunidad y gobierno pa logra un maneho publico mas practico y eficiente. “Nos kier pa e sector empresarial sinti cu nan tin un apoyo y cu nan esfuersonan ta ser balora. Un administracion mas eficiente, no solamente ta beneficia comercio, pero henter e sociedad Arubano.”
E reunion a conclui cu un intercambio di idea riba posibel solucion y pa mayor colaboracion, cu e obhetivo di mantene un dialogo constante cu ta permiti FUTURO y e comunidad Hindu di Aruba traha hunto riba un futuro miho pa TUR.
