Riba social media y den Bon Dia Aruba a publica awe 23 di october 2024 un articulo unda ta bisa cu Rondel Heyliger, candidato number 8 riba e lista di partido politico FUTURO lo a ricibi 96 permiso di ex-Minister Chris Romero.
Den e articulo aki ta crea e impresion cu Heyliger a haci algo robes pa por a haya e permisonan. Tambe e articulo ta menciona cu Heyliger ta miho amigo y campañado di ex-Minister Chris Romero.
FUTURO ta pone, a continuacion, e echonan pa e votado por wak cu e atake ta uno baho y contra berdad.
Heyliger a entrega su permiso di taxi:
- Heyliger ta bin di un famia cu pa 25 aña largo ta core taxi;
- Como consecuencia di un accidente durante trabou di taxi, Heyliger su tata (dfm) a keda invalido y consecuentemente su mama a tuma over y a core taxi pa 10 aña largo;
- Despues di e 10 añanan aki, Heyliger mes a tuma over como taxista pa 2 aña, finalmente Heyliger no tawata desea di a sigui core taxi mas y a haci un peticion, por escrito, na ex-Minister Chris Romero pa entrega e permiso di taxi bek y bin na remarke pa dos permiso pa Transfers & Tours (O-vergunning y T-vergunning);
- Ex-minister Chris Romero a bay di acuerdo y riba peticion di Heyliger, a revoca su permiso di taxi dia 24 di juni 2021 pa ex-Minister Chris Romero, pero no a otorga e O-vergunning, ni e T-vergunning na Heyliger;
- Recientemente, actual minister demisionario Ursell Arends a duna Heyliger e O-vergunning y e T-vergunning riba 11 september 2024 y Heyliger a haci pago necesario dia 9 di october ultimo;
Heyliger su deseo pa cuminsa un car rental:
- Como comerciante di San Nicolas, Heyliger tabatin e deseo pa bin cu un compania di car rental y riba 3 di mei 2018 a entrega un peticion oficial (sin inclui cantidad desea) na ex-minister Chris Romero pa por bin na remarca pa e permisonan necesario pa cuminsa cu un car rental;
- Heyliger a manda diferente recordatorio pa ex-minister Chris Romero, entre otro, riba 5 di februari 2021;
- Heyliger a reuni cu ex-minister Chris Romero prome cu gobierno a cay y den e reunion ey, el a wordo informa cu e lo haya e permisonan pa cuminsa su negoshi na San Nicolas;
- Heyliger a wordo yama tambe door di e director di Transporte Publico kende a bis’e cu e permisonan a keda otorga;
- Despues di pandemia, Heyliger a manda tambe un peticion na Minister Ursell Arends pa finalisa e proceso;
- Despues cu actual minister Arends a bira minister, Heyliger a keda follow up y a bin tende informalmente cu e permisonan a wordo revoca;
- Na ningun momento Heyliger a ricibi un documento oficial di Minister Ursell Arends unda cu e ta wordo informa cu e no lo ricibi e permisonan y cu nan a wordo revoca, ni tampoco Heyliger a wordo splica dicon y si e por acudi na un hues pa defende su interes como comerciante manera cu ley ta stipula den e casonan aki.
Basa riba esaki, ta obvio cu Rondel Heyliger na ningun momento a comete un acto coruptivo. Heyliger ta un hoben empresario di San Nicolas cu tabatin un soño pa cuminsa su empresa, e prome car rental y compania di tour oficial di San Nicolas, pero lamentablemente pa motibonan puro politico el a wordo nenga, sin ningun splicacion, documentacion y sin dun’e ningun informacion con e por defende su mes manera ley ta stipula.
Tur hende na Aruba tin derecho pa haci un peticion pa cualkier permiso y ta na nos gobernantenan pa tuma decision conforme nos ley, y no por mancha e bon nomber di un ciudadano pasobra un politico a tuma e un cierto decision.
FUTURO ta lamenta cu e credibilidad di un hoben empresario di San Nicolas, cu deseo pa traha pa Aruba y specialmente pa San Nicolas, ta wordo ataca sin motibo valido. FUTURO lo sigui lucha pa eleva e calidad di politica y empodera politiconan hoben cu kier traha pa construi un miho futuro pa Aruba.
Documento, peticion, intercambio di e-mail y tambe decisionnan ministerial cu ta substancia esaki ta den posesion di partido FUTURO. Ta inclui decision ministerial di 11 september 2024 ultimo unda cu actual Minister Demicionario Ursell Arends a otorga 2 x T-vergunning y 2x O-vergunning na Heyliger.
