Prome Minister mr. Mike Eman conhuntamente cu Minister mr. Geoffrey Wever tabata presente na e presentacion di e rapport di Aruba Climate & Ocean Risk Vulnerability Index (CORVI). Gobierno di Aruba ta poniendo enfasis riba e direccion unda nos isla lo tin cu bay pa cuido di nos medio ambiente. Esaki lo encera cambionan basta importante unda cu lo haci nos pais mas sostenibel y haci nos mas isla reciliente pa cambio climatico.
Prome Minister durante e mainta di presentacion di e estudio CORVI ta contento cu e estudio presenta unda cu e parti mas esencial ta e adaptacion cu nos tin cu haci ta un cambio den nos mindset. “Nos tin cu realisa cu nos no mester biba unicamente pa tin hotel di 5 strea, pero nos mester tin calidad di 5 strea tambe, scol di 5 strea, bario di 5 strea pero tambe protecion di nos miedo-ambiente na nivel di 5 strea” e premier a remarca.
Aruba ta duna un paso importante pa fortifica su recilencia climatico cu e presentacion final y publicacion di e Aruba Climate and Ocean Risk Vulnerability Index (CORVI). E ta representa e culminacion di un proyecto di investigacion cu a dura un aña. E estudio CORVI ta realiza den colaboracion cu The Stimson Center y co-financia pa un grupo di institucionnan local: Aruba Airport Authority (AAA), Arubabank, Aruba Hotel and Tourism Association (AHATA), Aruba Tourism Authority (ATA), Banco Central di Aruba, Gobierno di Aruba, MetaCorp, SETAR, WEB Aruba, y Utilities Aruba.
E proyecto a analiza den manera detaya e riesgo sistemico di clima di Aruba y su vulnerabilidad ecologico, social y economico, asuntonan cu ta toca nos tur. Durante e presentacion, The Stimson Center a presenta e principal descubrimento y recomendacion prioritario di e estudio CORVI di Aruba. E reporte oficial tambe a keda entrega na varios instancia, miembro di parlamento cu tabata presente diamars mainta na Eagle Resort.
E resultado di e estudio CORVI ta duna un base di dato importante pa fortalece e posicion di Aruba den e discusionnan global di clima. E National Climate Resilience Council of Aruba (NCRC), bou di liderazgo di su presidente Dr. Ryan R. Peterson hunto cu Gabinete AVP-Futuro ta boga pa promove un futuro climatico reciliente pa nos isla.
