Durante e apertura di e cancha di futbol na Madiki diamars anochi, Prome Minister mr. Mike Eman, a expresa su satisfaccion pa por crea areanan publico cu ta duna acceso na tur hende, sin importa nan nivel di entrada. Un cancha deportivo manera esun di Madiki, ta habri pa tur mucha, sea di casnan social of casnan particular. “Ora crea linear parks, tur hende por uza esaki, ora crea plasa, tur famia por bin hunto. Ora cu Gobierno crea avenidanan manera Watty Vos Boulevard of Green Corridor, henter comunidad por uza esakinan pa nan bienestar”.
Na 2015, ora Prome Minister Eman a inaugura e cancha di turf di futbol na Madiki, a surgi algun aña den cual e gobierno anterior a neglisha esaki completamente, mescos cu e otro barionan cu mas mester di e atencion di gobierno. Awe Prome Minister Eman ta bek pa yuda cada un di e barionan aki y e anochi aki a toca Prome Minister Eman, hunto cu Minister di Deporte Gerlien Croes y Minister di Turismo Wendrick Cicilia pa inaugura e cancha completamente renoba y duna inicio na actividadnan deportivo di bario pa e hobennan.
Na mes momento, Prome Minister Eman a anuncia algun proyecto grandi di revitalisacion y renobacion di barionan social cu lo cuminsa den secuencia accelera. Den e proximo dianan lo inicia cu e destaho publico pa renobacion di De Vuyst y Bushiri Complex cu lo haya un infrastructura nobo, un area comunitario y lo percura pa cada un di e barionan aki, cu a keda bandona pa casi ocho aña largo, haya su debido atencion. Pa varios aña, e habitantenan di e barionan aki no a mira presencia di e gobernantenan, ni instancianan pa scucha nan dolor, pero mas bien ta sinti cu a bandona nan. Awe Prome Minister Eman ta bek pa yuda crea barionan renoba y mehora, pa trece union bek den cada bario y percura pa e bon comun.
E mesun anochi a continua cu un partido di futbol amistoso entre e ekipo di Madiki contra e ekipo di Bushiri, pa trece bek e union y hermandad entre e barionan.
Proyectonan asina ta trece calidad di bida husto pa esnan cu mas mester esaki. Prome Minister a gradici FCCA pa nan compromiso y pa kere den e vision di Gabinete AVP-Futuro.
