Na Nieuwspoort na Den Haag a tuma lugar un simposio cu e titulo “Verbondenheid – 70 jaar Statuut van het Koninkrijk der Nederlanden”. E simposio aki organisa pa Gabinete di Minister Plenipotenciario di Aruba a conta cu discurso di personanan prominente, manera presidente di Hoge Raad, Dineke de Groot, ex Staatsraad pa Aruba na Raad van State y advisor di Aruba riba Relacion di Reino y Union Europeo Milly Schwengle, presidente di Corte Comun Mauritsz de Kort, profesor y ex-minister Ernst Hirsch Ballin y profesor Gert Oostindie. Anfitrion di e simposio Minister Plenipotenciario demisionario di Aruba mr. Ady Thijsen tambe a tene un discurso. Prome Minister demisionario di Aruba mr. Evelyn Wever-Croes a tene su discurso via video. Ex rector di Universidad di Aruba Viola Heutger a lidera e simposio.
Den tur e discursonan a reflexiona riba 70 aña di Statuut, kico ela nifica pa e paisnan den Reino y con mester mira e relacion den futuro. Minister Thijsen por ehempel a bisa cu Aruba ta kere den un Reino fuerte, basa riba convivencia, cooperacion, tuma decision conhuntomente y hunto carga responsabilidad. Pa loke ta cambionan cu segun sr. Thijsen lo mester bin ta un Areglo di Disputa (“Geschillenregeling”); duna parlamentarionan Caribense como “bijzondere gedelegeerden” derecho di voto banda di derecho pa entrega mocion y amienda durante reunion den Tweede Kamer riba leynan di Reino (rijkswetten). Tambe e mandatario a bisa cu mester bin claridad ki ora y con e paisnan den Reino lo mester brinda ayudo y sosten na otro. Esaki ta trata cooperacion y sosten riba hopi tereno manera husticia, economia, finanzas, gobernacion, salubridad, enseñansa, seguridad, cultura y deporte. Pa esaki hasta por yega na un Fondo den cual cada pais ta contribui proporcionalmente.
Como ultimo punto Minister Thijsen a bisa cu lo mester introduci un Conseho pa Derecho Humano pa Reino Hulandes, mescos cu tin un Raad van State pa Reino Hulandes.
Presidente di Hoge Raad Dineke de Groot a papia riba hurisdiccion den relacion cu Statuut, cu segun e presidente ta un muestra di e balor adicional y di un cooperacion exitoso di e Statuut pa Reino Hulandes. Segun sra. De Groot tur e cauter paisnan tin nan mesun instancianan huridico, pero ta traha hunto por ehempel den intercambio di hueznan. E presidente di Hoge Raad a mustra a base di ehempelnan cu e parti Caribense di Reino ta haci un apelacion riba De Hoge Raad, di cual na 2023 un total di 74 caso a keda trata pa De Hoge Raad.
Ex-staatsraad pa Aruba na Raad van State Milly Schwengle e referi na Reino Hulandes como cuater diferente mundo, pero cu un fundeshi comun. Segun señora Schwengle tin un diferencia entre Hulanda y a paisnan Caribense, pero na otro banda tin hopi coincidencia parcial y e diferencia no ta grandi pasobra e paisnan tin un DNA comun, cu segun sra. Schwengle ta e principio di un estado di derecho y e democracia cu ta ancra tanto na Hulanda como ne e paisnan den Caribe.
Prome Minister demisionario Evelyn Wever-Croes den su discurso a accentua cu e contactonan entre e paisnan semper lo mester ta basa riba cooperacion y no riba diferencia di opinion. Principalmente den un epoca di conflicto y guera, e hecho cu cu nos ta forma parti di Reino tin su balor adicional.
Den e di dos parti di e simposio tabata tin un panel di discussion cu a contra cu contribucion di presidente di Corte Comun Mauritz de Kort, profesor y ex-minister Ernst Hirsch Ballin, profesor Gert Oostindie y Minister Plenipotenciario demisionario Ady Thijsen.
Banda di e discussion y discursonan tambe e programa a consisti di un entrevista cu e studiante Arubiano Megan Irausquin cu a conta riba su experencia como studiante cu un Koninkrijksbeurs. E intermedio musical tabata den man di Jeremy Garcia.
