Gabinete di AVP-FUTURO a tuma nota di e declaracionnan di e Colegio di Supervision Financiero di Aruba (CAft), cu ta indica cu e empresa estatal Aruba Wastewater Sustainable Solutions (AWSS N.V.) a haci prestamo innecesariamente caro riba e mercado liber. Segun CAft, esaki ta causa cu pais Aruba tin cu paga casi 200 miyon florin di gasto extra y por lo tanto ta innecesario. E señalamento di CAft a causa comprendibelmente hopi consternacion y preocupacion den comunidad.
A menciona e mesun suma aki den un conseho cu Gobierno a ricibi recientemente di CAft, den cual CAft ta expresa duda den e manera con AWSS N.V ta maneha su asuntonan financiero. Pa e Gobierno, e hallazgo aki di CAft ta un motibo pa manda haci un investigacion profundo. Gobierno ta exigi contesta na e pregunta fundamental: riba kico Gabinete Wever-Croes a basa su decision pa scoge pa un construccion cu ta financieramente desfaborabel pa e comunidad. Gobierno lo evalua ki paso adicional lo tuma basa riba resultado di e investigacion aki.
Ademas Gobierno lo busca conseho tecnico pa mira ki posibilidad tin, den cuadro di bon gobernacion, pa para e prestamo caro haci innecesariamente pa AWSS NV. Adicionalmente, Gobierno lo pidi CAft pa kita e caracter confidencial di e conseho emiti, pa tur hende por haya conocemente di su contenido.
