Gabriela Gonzales, candidato di PPA durante conferencia di prensa di e partido oranje a elabora riba e topico con pa mehora e funcionamento laboral. Di e forma aki el a menciona e ley di BEL, Beneficio Economico Laboral, cu ta encera cu fin di aña un porcentahe di e ganashi di e compania ta bay pa e trahadornan como un incentivo. Trahadornan no lo mester paga belasting riba e suma aki y mientras tanto lo incientiva e dunadornan di trabou reduciendo nan winstbelasting.
Gonazales ta expresa cu esaki ta un bon manera pa incentiva e trahadornan pa traha mas duro pa e mesun compania, pasobra fin di aña nan lo por conta cu un entrada adicional pa celebra e dianan di fiesta.
Siguiendo cu e tema di labor, Gabriela a comenta riba e situacion di e contratistanan, cual ta un tema ‘cruel’ specialmente den sector turistico. Ley ta bisa cu por contrata hende como contratista te cu un aña, despues di e periodo aki e persona mester bira vast. Actualmente tin diferente compania cu ta keda uza e sistema di contratista riba termino largo, cual no ta aceptabel, Ademas e posicion aki ta corta e posiblidadnan di e trahador, manera por ehempel di por haya prestamo na banco y hipoteca.
Lo cual PPA kier y cu ta inclui den nan Plan Nos Aruba 2025-2050, ta pa cuminsa controla esaki y asina por duna e empleado e seguridad di por conta cu un trabou stabiel y por tin e posibilidad ariba menciona.
Otro aspecto cu PPA ta duna atencion na dje ta e reduccion di orario laboral di 45 pa 40 ora pa siman den un periodo di 10 aña y na un forma regula. Di e forma aki trahadornan lo por tin mas tempo pa por descansa. Den pasado, na 2013 Otmar Oduber, lider politico di PPA a logra reduci e orario ya caba for di 48 pa 45 ora pa siman.
Aspecto di trahadornan ilegal tambe a wordo menciona door di Gabriela Gonzales. E la indica cu calculacionnan ta mustra cu tin aproximadamente 10 mil persona indocumenta trahando na Aruba. Mirando cu nan ta laborando caba, intencion ta pa den forma cauteloso documenta e personanan aki y asina cuminsa aporta na Aruba tambe a traves di belasting y primanan social. Mirando cu na e momentonan aki nan no ta pagando nada, e paso aki lo ta un win-win situation, pasobra nan lo contribui cu Aruba cu impuesto y primanan, nan lo haya un status legal na Aruba cu tur e posibilidadnan cu esaki ta trece cune.
Gabriela a finalisa invitando pueblo di Aruba pa conoce mas di e Plan Nos Aruba 2025-2050 cual ta riba e website di PPA y diferente medionan social di e partido oranje.
