Dia 27 di april 2026, durante celebracion di Dia di Rey, e hobenan Randerly Trimon den categoria Hubenil y Ji-Zion Boekhoudt den categoria Pre-Hubenil lo ricibi e prestigioso Copa (Pre) Hubenil Gobernador Felipe B. Tromp 2026. E reconocemento aki ta wordo duna pa nan logronan sobresaliente riba tereno social y deportivo.
Den categoria Hubenil, e premio ta bay pa Randerly Trimon, un hoben di 19 aña cu a destaca pa su dedicacion, actitud positivo y su compromiso constante pa yuda, motiva y inspira otronan, hopi biaha riba base boluntario. Randerly ta miembro activo di e organisacion Believe in Yourself y anualmente e ta fungi como lider den diferente vakantiekampnan y actividadnan di organisacionnan manera Ban Hunga Kiniki, Friendly Camp, Scouting Aruba y otro. Cu casi 48 siman pa aña dedica na trabou boluntario, el a bira un ehempel di liderazgo y compromiso pa hopi otro hoben.
Ademas, Randerly tin un vision cla pa Aruba, specialmente den cuido di medio ambiente. Entre su proyectonan mas destaca ta e Proyecto Rosario fabrica cu material di reciclahe y e innovador Proyecto Sacuchicuchi, cu a gana e premio Poder di Hubentud organisa pa Asociacion Trabou pa Hubentud na Aruba. Cu e proyecto aki, Randerly a logra stimula muchanan di scol pa reciclahe y separa materialnan manera plastic, papel, carton y boter. El a crea e mascota “Sacuchicuchi”, a compone un cantica educativo y a desarrolla material didactico, incluyendo buki di guia y buki di kleur, cu actualmente ta wordo usa den tres scol piloto. Danki na su negociacion cu Eco Tech, tambe a logra haya 8 bari di reciclahe cu ainda ta den uzo activo bou di su supervision.
Den categoria Pre-Hubenil, e premio ta bay pa Ji-Zion Boekhoudt, un hoben atleta di apenas 8 aña cu a demostra perseverancia, dedicacion y compromiso extraordinario den deporte di coremento. Ji-Zion, miembro di Eagle Runners, ta practica atletismo for di cuatro aña y, apesar di a enfrenta un lesion cu tabata stroba su progreso, el no a laga esey detene dje. Contrario na esey, el a continua contribui como boluntario na caredanan y caminatanan, apoyando organisacionnan manera IBISA, Patrishi Sports y su propio team cu trabounan logistico y registro digital di participantenan.
Durante aña 2025, Ji-Zion a representa Aruba tres biaha den exterior. Na Miami el a logra su mehor marcanan personal, na Orlando el a gana prome luga den 400 meter sprint y di cinco luga den 200 meter sprint, y na Corsou el a logra prome luga den 60 meter sprint y 400 meter sprint. E ta tambe un miembro activo di Alpha Runners. Na december 2025, Ji-Zion a ricibi e premio di Year End National Ranking den su categoria, organisa pa Patrishi Sports. Su perseverancia y determinacion a haci cu el no solamente supera obstaculonan personal, pero tambe hiba nomber di Aruba cu orgullo riba nivel internacional.
E dos ganadornan lo ricibi nan premio for di man di Gobernador di Aruba durante un ceremonia oficial cu lo tuma luga den Wilhelmina Park riba Dia di Rey, 27 di april 2026.
