‘Pionero, retá pa pandemia, vishon pakiko sigui’, asina Gabriel ‘Boy’ Magdalena ta splika kon e ta mira su empresa General Catering, awe 50 aña despues ku el a kuminsá ofisialmente kuné na Kòrsou.
E empresa a kuminsá 16 di òktober 1972 na e kèmpes ku tabata na Schelpwijk i a krese bira e servisio di catering renombrá situá awe na skina Fransebloemweg/Santa Rosaweg kaminda tur dia nan ta sirbiendo Kòrsou ketu bai.
‘Bon kuminda, den ki forma ku e ta, ta alimentá alma di hende i nos tin e lugá ei bon sirbí ainda’, asina Boy Magdalena ta sigui bisa.
El a sigui bisa di ta yama un danki na kada kliente ku tabatin.
‘Mi ta kontentu di por a sirbi hende ku un kaha di snèk te e.o. e servisio ku nos a duna na p.e. e gran Sophia Loren i O.J. Simpson i otronan dia ku nan a bin graba e pelikula Fire Power aki na Kòrsou. Tambe nos por a sirbi Reina Beatrix, presidente venezolano Carlos Andres Perez i otronan. Esakinan tabata nos oportunidat grandi pa a realmente demostrá nos profeshonalismo ku un servisio ku a kumpli ku delaster un detaye na nivel internashonal.
Pero no kere ku tur kos a bai fásil semper.
Pa keda na altura mi tabata bai tur aña dos konferensia di catering internashonal: unu na Merka, unu na Europa, pa asina mi por a keda na altura pasobra mi mester a tuma mi mes na serio i por a sigui hasi esei kedando siñando i espesialmente lesando pa keda na altura di kiko ta pasando den e mundu di alimento.
Awe, despues di espesialmente e resien pandemia, mi ta akseptá ku nos a wanta, hasiendo hopi sakrifisio pero nos por a sigui. I e desaroyonan aki ta loke mi no a imáginami nunka, loke ke men ku den bida e bueltanan tei i si bo no ta prepará pa ta flèksibel i pa bai ku tempu loke ta inevitabel, bo ta kaba na nada.
Keremi, hasi negoshi semper tabata un reto i na e momentu aki e ta pió ku nunka’, asina Boy Magdalena a splika.
Riba e pregunta kua ta e reto di mas grandi ku el a topa kuné Magdalena a suspirá i a bisa ku for di kuminsamentu di su empresa e tabatin mester di semper hende pa traha pasobra bo so no por hasi un negoshi.
‘Mi mester bisa tambe ku esei ke men ku bo negoshi ta dependé di e empleado i pa asina ei tin e kliente ku nos ta apresiá mashá i pa por duna e kliente mihó servisio posibel’.
Boy Magdalena a finalisá bisando ku: ‘Mi famia i ami, nos empleadonan aktual i espesialmente mi yu hòmber Gabriel ku aworaki tin mando di General Catering, di kurason ta yama danki na tur ku di un forma òf otro ta(bata) envolví den e éksito di General Catering.
Nos ta sigui sirbi Kòrsou i nos sa ku basá riba nos eksperensia, ku kualke problema òf situashon ku bini ku nos por sigui’.
