Den nos ultimo articulo nos a describi e Bon Comun como un compas pa un pais mas fuerte. Si abo como lector a sigui e liña cora di tur articulo bo por a ripara cu tin un laso entre tur e perspectivanan describi di Verbrugge, Balkenende, Buijs y por ultimo Block. E ultimo articulo aki su proposito ta netamente crea un link entre e mescla y laso entre e diferente perspectivanan. E esencia ta cu e Bon Comun lo guia y stimula un desaroyo di speransa, esaki ta un di e mensahenan clave cu bo por saca afor di tur e articulonan cumi persona a scirbi.
Na un comienso nos a sali describiendo e crisis di autoridad cual ta conoce su origen for di e sentimento cu ciudadanonan no ta wordo scucha y mira mas pa e partido politiconan tradicional. A trece dilanti cu ciudadanonan ta desconfia den instancianan tradicional y cu tin hopi distancia entre lidernan y e pueblo. Tambe cu burocracia ta hunga un rol grandi den e deterioro di stabilidad di e autoridad di un gobierno. Si bo analisa e temanan aki for di perspectiva di e compas di Bon Comun bo lo por elimina e crisis di autoridad. Pero con of di ki forma? Kinan ta unda e activismo relacional describi den e articulo anterior por ta di balor agrega door cu ta reuni cu ciudadanonan pa combersa riba loke realmente ta importante pa nan, explora posibilidadnan y asumi compromisonan colectivo. Di e manera aki ta elimina distancia entre e pueblo y su lidernan pero tambe establece lasonan di confiansa nobo cu e pueblo. Practice what you preach y keda den contacto cu e pueblo lo restaura y keda mantene e Bon Comun intacto y duradero.
Comercio y Bon Comun
Den e buki di Balkenende y Buijs a wordo reitera cu e capitalismo actual lo ta fayando door di falta di atencion riba termino largo pa desaroyo economico, husticia social y medio-ambiente. Block tambe ta bai riba e ponencia aki indicando cu un economia local por orienta su mes mas riba e balor social pero tambe comunitario y no solamente pe beneficio financiero. Cu otro palabra e Bon Comun como compas entre comercio y pueblo lo ta uno mucho mas fuerte y duradero si comerciantenan por ta mucho mas envolvi cu e comunidad. Kinan ta unda comercio y e pueblo/comunidad ta bira 1, pa e meta comun di un pais.
Rol actual di fundacionan/instancianan
Na Aruba nos tin diferente fundacion, instancia y gruponan cu un meta specifico den comunidad. Tur esakinan a lanta cu e proposito fiho pa logra cierto obhetivonan pa nan cliente of miembronan. Bo ta ripara cu nan ta sumamente engaged cu nan area y cu e pueblo trahando sumamente duro den nan respectivo area. Di nan parti dia aden dia afor nan ta usando e compas di Bon Comun caba. Pero si ta asina, e pregunta cardinal ta, nos ta cla of esaki ta suficiente? E contesta ta negativo pasobra nan tur por wordo yuda of asisti mucho mas door di e sector comercial, gobierno y ciudadanonan en general. (Tuma nota cu señalando esaki no ta nifica cu ningun hende ta yudando; pero cu movimiento di Bon Comun por bira aun mas grandi) Kinan ta unda reactivando e Bon Comun sigur lo tin su frutonan pa futuro. Den cuadro di esaki tur e fundacion, instancianan social y departamentonan cu ta contribuyendo na e Bon Comun lo ta den e expo di 29 januari 2026.E invitacion ta pa pueblo general por asisti pa sa mas di nan trabou y con pa aporta na nan.
E rol di e Gabinete actual y su relacion cu e Bon Comun
Pero no solamente riba nivel di instancianan pero tambe riba nivel di Gobernacion mes tambe e Bon Comun ta wordo usa como compas. Pueblo por nota tambe cu nos Premier Eman na un forma pro-activo y cu pasion ta aplicando e Bon Comun como compas pa asina sigui haci nos pueblo di Aruba ainda mas fuerte. Como Premier di e pais aki e tin un oido pa diferente grupo den nos comunidad. Asina nos por menciona nos grandinan cu ya caba a logra haya un aumento di afl. 500 florin. Esaki ta sin conta cu a haya un suma adicional tambe door di reduccion di prima di AZV. Durante bishita den barionan bo ta haya como feedback cu e gobierno a scucha e dolor di e pensionado y ta cumpliendo. Un otro ehempel ta di ciudadanonan cu a wordo confronta cu pago di remedi cual tawata algo inhumano y condenabel bou di Gabinete anterior. A dicidi remedia e situacion asina haciendo e situacion uno mas aceptabel ora ta trata di gastonan di remedi aliviando e pashentnan. Gabinete anterior a desconecta su mes for di e pueblo y no tawata scucha mas e sentimento di impotencia financiero di e ciudadano. Imaginabo hasta pa deshaci di desperdicio tur hende a wordo confronta cu gastonan halto. Ta como sifuera tin sushi a bira un luho pa get rid di dje. Pero Gabinete AVP/Futuro a pone man na curason y biba cu e pueblo. E accionan den bario y bakinan den bario tambe ta ehempelnan di con e Bon Comun ta wordo aplica. E realidad ta cu cada biaha cu tawatin baki den bario tawatin un fila averahe di 450 pico pickups cu a probecha pa deshaci di nan sushi sin gasto cu ta afecta nan manera di biba y presupuesto negativamente. E ta un muestra palpabel con e gobierno ta practicando e Bon comun pasobra di un banda ta yudando e ciudadano y na otro banda ta yudando nos naturalesa tambe door cu ta minimalisando dumpnan ilegal paso a paso rond Aruba. Di un forma structura y consistente como lider di e pais, e ta keda den contacto cu e pueblo door di bishitanan semanalmente. Gruponan specifico den nos comunidad e ta sinta cu nan, pa asina e por encurasha nan tambe pa contribui den forma colectivo na e Bon Comun di Aruba. Adicionalmente e ta trata na convence comercio cu nan tambe tin un obligacion y tarea moral pa contribui na e Bon Comun di Aruba. Nos ta convenci cu e Bon Comun lo wordo reactiva y spread like a wild fire contagiando tur sector, instancia, ciudadano, grupo, empleado publico y gobierno.
E Common Good Expo lo tuma lugar dianan 29 y 30 di Januari na Seaport Conference Center den cual diferente orador lo bai hiba palabra. E invitacion ta bai pa tur ciudadano interesa den e Bon Comun pa asisti y participa den e sessionan aki.
