Den part I, di e articulo nos a elabora den liña grandi riba e introduccion di professor Verbrugge (despues referi como; Verbrugge) su buki titula “Gezagscrisis”. Den e segundo parti aki lo nos kier highlight algun punto interesante for di e contenido di su capitulonan. Den su promer capitulo Verbrugge ta pone enfasis riba e legitimidad di e autoridad. Esun cu tin e autoridad tin algo di bisa, na un manera cu otronan lo tende di dje. Bo por mira autoridad for di e angulo di bestuurskunde (e sciencia di adminitracion publico), pero esei no ta e perspectiva cu e ta analisa. Importante ta pa haya contesta riba e pregunta con autoridad ta origina. Eynan Verbrugge ta bai diep den teoria di Aristoteles, cual defacto ta describi e ser humano como un elemento politico. Segun e teoria aki e ser humano lo prefera di biba den un sociedad cual tin bon lidernan cu capacidad di compronde e sociedad y guie den un bon rumbo. Hopi importante ta pa e lider tin caracteristicanan sobresaliente. E virtud principal di un bon gobernante mester ta su rectitud y integridad. Tur loke e haci mester tin un seyo di imparcialidad cu enfasis riba rasonibilidad y honestidad. E virtud cu ta garantisa imparcialidad ta curashi, esta curashi pa señala y resolve casonan cu no ta aceptabel den un sociedad. Esun cu ta sobresali como lider mester ta prudente, posee conocimento den practica y mester sa kiko ta biba serca e pueblo.
Burocracia
Segun Verbrugge e sentimento di con un bon lider of e lider ideal mester ta por bai perdi door cu un gobierno ta bira un burocracia. Un burocracia ta un sistema di organisacion den cual trabounan ta dividi den diferente nivel y departamento, cu regla y proceduranan cu ta defini den forma hopi estricto. Den liña grandi e ta basa riba documento, hierarchia y regulacion pa hasi tur cos den un manera formal. Den e contexto aki Verbrugge ta subraya cu un persona por gana e confiansa di un cierto grupo den comunidad, si e tumanan interes na serio y scuchanan. Kinan ta unda e ta señala cu ciudadanonan ta anhela un gobierno cu ta interveni ora cosnan ta bayendo robes. Un gobierno mester percura pa ordo pero simultaneamente mester por tin libertad pe ciudadanonan. Kiermeen un bon gobernante mester por crea un balansa entre impone unda cu ta necesario y libertad di e ciudadano unda cu ta posibel.
Gobierno distancia di pueblo
E caída/falta di autoridad di un gobierno tin di haber cu gobierno ta distancia su mes for di e pueblo. Gobierno ta haci su trabou y controla via un oficina, pero den mesun rosea e gobierno ta perde e pueblo for di bista. Tambe e ta subraya cu no tin un storia en comun mas y un base cual e gobierno ta trahando pe. Den ki direccion bo kier bai? Kiko ta hustificacion pa cierto decisionan? Adicionalmente Verbrugge ta reitera cu gobierno den ultimo tempo a laga hopi cos den man di comercio cu consecuencia cu “maneha na banda” ta bira complica. Door cu gobiernonan a bira demasiado centralisa e contacto cu pueblo a bai perdi. Verbrugge ta enfatisa cu centralisacion di un gobierno automaticamente lo hiba na un burocracia. Verbrugge ta señala algun area den cual gobiernonan no ta stabil. Ta carece entre otro di conocimento cognitivo. E Gobierno ta steun y depende riba conocimento. Esaki no ta wordo considera robes, pero consecuentemente e gobierno ta perde pueblo for di bista. E transicion rumbo sostenibilidad ta wordo logra pa medio di incentivonan financiero. Di e manera ey placa ta bai den saco di esnan rico, mientras esnan economicamente menos fuerte no por participa na e desaroyo sostenibel.
Los di e puntonan señala, Verbrugge den su buki ta menciona y splica den detayes e falta di moralidad y e bashi den sociedad di parti gobierno. E temanan aki y mucho mas lo wordo trata den e Common Good Expo cu lo tuma lugar dianan 29 y 30 Januari na Seaport Conference Center. Pesei e ta asina importante pa ciudadanonan interesa den e Bon Comun asisti y participa den e sessionan aki.
