ORANJESTAD – Un decision di minister Gerlien Croes a pone Aruba den un situacion hopi peligroso: el’a elimina e departamento cu tabata organisa y regula tur cos rond di Kinderopvang (creche). E departamento aki tabata e mesun cu tabata implementa e Ley di Creche y tabata pone regla pa proteha nos muchanan chikito.
Cu esaki, Aruba ta bolbe bek na un era di “free for all”, un epoca caminda no tin control, no tin regla, y cualkier hende por tene 30 mucha den un cas bao di un solo leidster, sin atencion pa hygiena, sin normanan cla y sin ningun proteccion pa esnan di mas vulnerabel.
Peligro real pa mucha
Tur hende sa cu e tema di creche no ta un joke. Den pasado tabatin situacionnan tristo cu a pasa, incluso caso caminda mucha a perde bida den creche. Esaki a pone precion pa crea regulacion serio: mas control, mas hygiena, y un limite cla di cuanto mucha un leidster por tin bao su vigilancia. Elimina e departamento aki ta hustamente kita vigilancia y obstaculisa pa pone den practica e proteccionnan aki.
Ta dal paso grandi patras
Eliminacion di e departamento ta mustra como un paso hopi grandi patras. Enbez di sigui pa lanta un sistema sigur pa muchanan y pa hopi famia cu ta depende di creche, e decision di minister Gerlien Croes ta kibra tur esfuerso haci y ta pone nos muchanan den riesgo.
Un mama cu ta manda su yu na un creche a bisa cu lagrima: “Nos ta depende di creche pa por traha. Pero sin regulacion, ken lo ta garantisa cu mi yiu ta na un luga sigur? Mi no kier haya sopresa cu un noticia cu algo a pasa cu mi yiu. E gobierno mester wak pa nos, no kita proteccion di nos.”
Falta di vision
Na momento cu hopi pais ta fortalece proteccion pa mucha, Aruba ta bay den un direccion contrario. Esaki ta duna un imagen cu gobierno no ta pone prioridad riba seguridad di generacionnan di futuro.
Minister Gerlien Croes mester duna claridad na pueblo: kiko e ta gana cu elimina regulacion? Ta keda cla: e muchanan di Aruba ta e victima grandi di decision descabeya di Gerlien Croes.
Kico AVP ta bisa ?
Partido Avp den pasado a bin cu e ley aki. Nan mes a boga pa mas control na creche. Awor cu e regulacion a cuminza, Gerlien ta yega y bente abao ?
