Via eanews:

Politica Sushi e peliger di desmantela pa ‘Re-inventa’ bou di Gerlien Croes

Aruba ta den gara di un maneho unda propaganda ta bin promove cu proteccion. Den un intento pa posiciona e coalicion AVP-FUTURO como e “salbador” di e sistema, Minister Gerlien Croes hunga un politica sushi, desmantelando structuranan vital djis pa por rebendé nan como idea nobo, mientras e consecuencia di e paralizacion aki ta wordo sinti den e camanan di hospital.

Les di pasado cu a wordo sabotea

Comunidad di Aruba no por lubida e trauma di e casonan di Richandro y Eugene. E tragedia ey tabata e motivo pakico e gobierno anterior (MEP) a actua cu urgencia pa structura e Departamento di Mucha y Hoben (DMH). E meta tabata cla: asumi e responsabilidad cu pa mas di 20 aña a wordo ignora, garantisa e implementacion di e ley di centro di cuido y percura pa e Meldcode den Codigo Civil wordo aplica debidamente.

Sinembargo, cu e cambio di mando, Minister Gerlien Croes a opta pa un caminda peligroso. En bes di duna continuidad na un departamento cu ya tabata cla pa ehecuta, e mandatario a scoge pa “doek op” tur loke cu otro a traha. Esaki no ta reforma ni innovacion, esaki ta un sabotaje administrativo pa interesnan partidista.

Uso di Recurso y Falta di Vision

E “politica sushi” aki tin un prijs halto:

Malgasto di Recurso: Desmantela y bolbe lanta e mesun cos ta costa placa di pueblo.

Paralisacion Administrativo: Trahadonan publico y expertonan ta keda den incertidumbre mientras e Minister ta dicidi con pa haci e projecto “di dje”.

Seguridad den Peliger: Cada dia cu e ley di centro di cuido no wordo ehecuta pasobra e Minister kier “cambia nomber”, ta un dia mas cu nos muchanan ta core riesgo.

Un fachada cu consecuencia real

E mentalidad di Minister Gerlien Croes ta mustra un falta di vision nacional. Proteccion di mucha no mester tin color politico. Si e gobierno anterior a laga un base cla, e deber di un minister responsable ta pa fortific’e, no bor’e pa skirbi su propio nomber riba e muraya.

Aruba no por permiti pa e bida di nos muchanan wordo uza como piesa di intercambio den un campaña di imagen. E “wega di payaso” aki mester para prome cu un otro tragedia sacudi nos isla. Pueblo ta exigi accion, supervision real y transparencia, no mas propaganda cu holó di oportunismo.