Gezaghebber di Boneiro, John Soliano, a destaca e importancia di colaboracion entre islanan pa fortalece acceso na financiamiento y enfrenta reto comun, durante e di 21 edicion di Overseas Countries and Territories – European Union Forum
Durante su participacion na Conferencia Ministerial, Soliano a enfatisa cu e foro ta brinda un plataforma importante pa unifica posicionnan y traha hunto riba prioridadnan comparti.
“E foro aki ta reuni tur e isla nan pa fortalece colaboracion y defini interes comun pa e futuro,” segun Soliano.
Un di e puntonan central menciona tabata e necesidad pa modernisa y simplifica e proceso di financiamento di Union Europeo, pa asina haci esaki mas accesibel pa e islanan. “Nos kier mira un proceso mas eficiente, menos burocratico, pa logra acceso na financiamento di forma mas rapido y efectivo,” el a indica.
Segun Soliano, e cooperacion entre teritorionan ta crea oportunidad pa forma un bloke mas fuerte, cu por negocia y logra resultado mas concreto. “Door di traha hunto, nos por fortalece nos posicion y logra impacto mas grandi pa nos comunidadnan,” el a añadi.
El a subraya cu e retonan cu e islanan ta enfrenta ta amplio, incluyendo cambio climatico, energia, movilidad, siguridad y desaroyo economico. “Retonan manera clima, energia y infrastructura ta exigi solucion structural a largo plaso,” segun Soliano.
El a enfatisa cu no ta basta solamente pa implementa proyecto a corto plaso, pero cu mester tin inversion sostenibel cu por garantisa resultado duradero pa futuro di e islanan. “Nos mester move di proyecto cortico pa programa di impacto cu ta sostene desaroyo a largo plaso,” el a declara.
Soliano a conclui cu cooperacion dentro di region y den Reino Hulandes ta cada bez mas importante, specialmente den un contexto global cambiante. “Colaboracion entre islanan ta esencial pa fortalece resiliencia y prepara nos pa futuro,” segun Soliano.
E participacion di Bonaire den e foro ta confirma su compromiso pa cooperacion regional, fortalecemento institucional y un desaroyo sostenibel cu beneficio pa su comunidad.
Tocante OCTA/OCT-EU Forum
The 21st Overseas Countries and Territories – European Union Forum
Na april 2026 Aruba lo ta anfitrion di e di 21 edicion di Overseas Countries and Territories – European Union Forum, un plataforma internacional pa dialogo entre Union Europeo y su Paisnan y Teritorionan Ultramar (LGO).
E foro ta reuni formuladornan di maneho, diplomaticonan y representantenan di sector publico y priva pa discuti temanan strategico manera cooperacion sostenibel, cambio climatico y transformacion digital.
Como Pais y Teritorio Ultramar, Aruba tin un rol unico como brug entre Europa y region Caribe. E foro ta brinda un oportunidad pa fortalece cooperacion y intercambio entre partnernan internacional.
