Gisele-Mireille Sint Jago (PP), Aruba: Prome pais cu Status Aparte, pero ultimo pais den Reino y Caribe cu Ombudsman parti (1).

Diahuebs siman pasa tawata un dia cu a trece hopi confusion den pueblo di Aruba, ora cu Parlamento a trata e Ley di Ombudsman. Na final varios politico a acerca prensa pa vocifera pakico e partidonan cu ta nan oponente a faya. E pregunta cu a preocupa mi henter weekend ta: Dicon e otro paisnan den Reino, di cual dos di nan a haya nan Status Aparte 24 aña despues di Aruba, si a logra esaki respetivamente 19 y 12 aña pasa? Bonaire, Saba y St. Eustatius ta cay bou di e Ombudsnan Nacional di Hulanda desde 10-10-’10. Ademas, e ta normal pa e tarda 2 aña pa un Gobierno tarda habri e officina di Ombudsman y implementa e ley cu ta aproba caba pa asina Parlamento por busca y nombra e prome Ombudsman den historia di Aruba? Prome cu nos bay wak kico a stroba pa e ley di Ombudsman wordo ancra den nos constitucion, ban wak con esaki a wordo haci na nos paisnan ruman den Reino y den Caribe. 

Historia di Ombudsman den Caribe.

Den Caribe e prome pais cu a introduci un Ombudsman tawata Guyana. Nan Ley di Ombudsman a pasa dia 30 di augustus 1967 (Parliament of the co-operative Republic of Guyana Ombudsman Act (1967). Trinidad y Tobago a sigui na 1976 y mas pais/teritorio den Caribe a sigui cu esaki te cu aña 1999. Curaçao a haya su prome Ombudsman na aña 2003 y Sint Maarten na aña 2010. Aunque den bes en cuando e nomber di e instituto lo por ta diferente den nos area, e contenido di e trabou ta cumpli cu e tarea di ta un defensor di pueblo. 

Con Ombudsman a cuminsa na Hulanda. 

Prome cu e instituto ombudsman a wordo instala, tawata tin un programa di television desde 1969 cu e nomber ‘Ombudsman’ di e organisacion di transmission di radio y television VARA. Cu otro palabra, pueblo no a warda pa e politiconan keda cla cu e ley ni cu e instituto pa cuminsa haci uzo di nan derecho pa keha tocante inhusticia cometi door di nan Gobierno. VARA su programa Ombudsman no tawata duna e eyudo legal, pero si tawata bati riba porta di Gobierno pa pone luz riba asun  nan di inhusticia. Den e sentido aki, nos por bisa cu algun radio emisoria na Aruba ya caba a crea un plataforma pa pueblo por papia di su experiencia of keho tocante e trabou di tur e Gobiernonan cu a sinta. E ley di ombudsman a wordo aproba na 1981 y e prome ombudsman a wordo instala na aña 1982. Un aña despues, na 1983, e programa di VARA a stop. 

Introduccion di Ombudsman na Curaçao y St. Maarten. 

Na Curaçao a publica den PB 2001 no. 69 cu lo instala un ‘Ombudsfunktionaris’ Na 2003 a nombra e prome Ombudsfunktionaris den e persona di mr F.P. Wiel. Curacao a logra 7 aña prome cu su Status Aparte di 10 -10 -‘10, pa duna pueblo su defensor di pueblo. Na e momento aki Mr. mr. Keursly Concincion ta e Ombudsfunktionaris di Curaçao. 

St. Maarten a aproba e Landsverordening di Ombudsman dia 10-10-2010. Riba e mesun fecha Parlamento a nombra e prome Ombudsman di St. Maarten: Sra mr. Nilda Arduin. Pues, a prepara y selecta un Ombudsman prome cu a aproba e Landsverordening mes. Na e momento aki Sra mr. Gwendoline Mossel ta Ombudsman di Sint Maarten. 

Officina di Ombudsman Aruba

Mi ta kere cu Gobierno di Aruba y Parlamento no mester tarda hopi mas pa habri e officina di Ombudsman na Aruba. Durante e Crisis di Covid, hopi hende lo tawata mester di e ayudo di Ombudsman caba y tur e 12 y 19 ana prome cu esey tambe. Lo no tawata tin decadas di rapport annual y otro data pa tene e Gobiernonan anterior responsabel y cu sigur lo por a preveni abuso di poder di Gobernantenan y falta di tuma accion. Mas e Gobierno aki warda, mas sospechoso e asunto aki lo bira. Mi ta sigur cu tin hala di persona cu keho pendiente. 

Gisele-Mireille Sint Jago (PP), Aruba: Prome pais cu Status Aparte, pero ultimo pais den Reino y Caribe cu Ombudsman. (Parti 2) 

Ley di Ombudsman: Mester ta den Constitucion? 

Na Hulanda despues di instala e instituto di Ombudsman na aña 1982, el a tarda 17 aña mas, pues te cu 1999, pa e Ley di Ombudsman wordo ancra den constitucon di Hulanda. Esey kiermen cu e officina independiente aki por a funciona debidamente sin ningun problema solamente riba un Ley cu ta comparabel cu un Landsbesluit. Y sin cu tawata tin un ley ancra den constitucion Hulandes. E Ombudsman por a brinda e ayudo legal y sin gasto pa e individuo y haci e diferencia necesario como defensor di pueblo pa pueblo, sin cu e Ley di Ombudsman tawata ancra den Constitucion.

Con e Ley di Ombudsman ta ancra den constitucion di Hulanda, Curaçao y Sint Maarten? 

Pa conclui, adhunto por wak den e tabel un comparacion con e otro tres paisnan den Reino a pone e reglanan cu minimo mester cumpli cu n’e, pa por tin un Ley di Ombudsman den Constitucion. E tres leynan ancra den Constitucion ta casi identico, Nos ta un pais autonomo den Reino cu nunca a wordo decolonisa conforme articulo 73. Algo cu COHO a demonstra preto riba blanco. pues, mi no ta compronde pakico votacion pa e Ley di Ombudsman lo mester a trece tanto discussion paden y pafor di Parlamento y cu Gobierno y politiconan a purba di saca probecho politico cu e hecho cu e ley no (por) a wordo aproba mesora cu 2/3 parti di Parlamento. Pasobra, e ley di Ombudsman di Aruba y tur otro ley cu ta drenta den Staten di Aruba, mester wordo aproba door di Staten Generaal na Hulanda, prome cu e yega Staten di Aruba mes. Ban spera cu e nombracion y installacion di Aruba su prome Ombudsman (m/v) lo keda cla prome cu aña bolter.