Aruba ta na fiesta! Nos talentoso cantautora Glenda Zavala Maduro a cosecha un logro monumental den e mundo musical di vallenato. Su letra a keda selecciona pa participa den e prestigioso festival La Leyenda Vallenata, cu lo tuma luga na Valledupar, Colombia, for di dia 30 di april te cu 4 di mei.
Glenda lo subi escenario riba dia 30 di april como un di e “Canción Inédita”nan den competencia. Esaki ta un momento di gran orguyo pa Aruba, mirando cu Glenda ta representa nos isla den un evento di taya internacional den e genero di vallenato.
Ta importante pa remarca e perseverancia y dedicacion di Glenda, kende a purba participa den e festival aki pa dos aña consecutivo. Awe, su esfuerso a duna su fruto cu e titulo di su cantica “Te Canto Valledupar”. Pabien di curason na nos talentoso compositora!
E logro di Glenda ta ainda mas impresionante ora nos realisa cu di un total di 258 cantica cu a participa, solamente 68 a keda selecciona. Y no solamente esey, Glenda su cantica ta ocupa e di dos lugar den e categoria di ritmo Paseo. Esaki ta un reconocemento grandi pa su talento y pa e calidad di su composicion.
Glenda Zavala Maduro ta un artista excepcional cu un pasion inmenso pa e genero vallenato. Su capacidad pa skirbi letra cu ta toca curason y su melodianan contagioso ta haci di dje un representante digno di e talento musical Arubiano. Nos ta aplaudi su dedicacion, su talento y e orguyo cu e ta trece pa nos isla.
Solo di Pueblo ta desea Glenda tur clase di exito den La Leyenda Vallenata y ta convenci cu e lo sigui cosecha hopi mas logro den su carera musical. Aruba ta cu bo!
