Gobernador di Aruba ta enfrentando un atake mediatico agresivo for di Partido AVP, lidera pa Mike de Meza, unda e ta ser acusa di supuestamente stroba e proceso pa De Meza bira minister. E criticanan no ta limita na solamente gobernador, sino tambe na Gerlien Croes y Mike Eman, kendenan ta e siguiente na e cadena di poder halto.
Mike de Meza ta culpa gobernador y otro lidernan
Den un declaracion recien, Mike de Meza a lansa acusacionnan fuerte contra e gobernador, (sin menciona su nomber) insinuando cu e ta strobando pa e no haya su nombracion como minister. E mesun tactica a wordo usa contra Gerlien Croes y Mike Eman, unda De Meza a bisa cu nan tambe ta stroba su nombracion, pero tambe sin menciona nan nomber.
Pero e acusacionnan no ta termina eynan. Den e programa di Radio Rochela, Speed y Patrick a lansa palabranan duro contra gobernador, bisando cu e “no mester lubida kico Mike de Meza a haci p’e” y recordando cu den pasado, De Meza a haci e gobernador “un gran fabor.” E mensahe ta claro: “Fabor se paga con fabor.”
AVP kier pordona e debe di belasting?
E atakenan ta parce relaciona cu e debe fiscal cu Mike de Meza tin pendiente. E argumento di AVP ta cu e gobernador y e autoridadnan fiscal mester “pordona” e debe pa asina De Meza por cumpli cu e requisitonan pa bira minister.
Pero e ironia grandi ta cu Mike de Meza ta acusando e oposicion di a saca e noticia di su debe fiscal den media, cual ta un mentira. E prome medio cu a publica e noticia ta esunan di Radio Rochela – e mesun medio cu ta aliado cu AVP.
¿Ken a informa Radio Rochela?
Segun fuente interno, e informacion a yega na Speed y Patrick via telefon, y e uniconan cu por a duna nan e detayenan ta Mike Eman of Gerlien Croes. Esaki ta pone De Meza den un posicion complica, pasobra e ta critica e leak, pero e leak a bin for di su propio partido.
E situacion ta mustra un wega di poder bruto den politica di Aruba, unda e gobernador ta wordo presiona pa cumpli cu e demandanan di AVP. E pregunta clave ta:
- ¿Lo gobernador cede na e presion of lo e mantene su posicion?
- ¿Kico realmente Mike de Meza a haci pa e gobernador den pasado cu e ta recordando e asina fuerte?
- Ta realmente necesario pa saca e carta di “fabor” contra gobernador?
E pueblo di Aruba ta sperando contesta y transparencia.
