Despues de un periodo largo di insistencia y debate, finalmente a logra! Gobierno di Aruba a habri e destaho publico pa e 17 tankinan di warda petroli (storage tanks) situa na Zeewijk. E paso aki ta representa un cambio radical den maneho y un oportunidad grandi pa e economia di nos pais.
Pa hopi tempo, e tema aki tabata centro di discusion. Diferente instancia, incluyendo e partido MEP, a vocifera repetidamente cu tabatin oportunidadnan nobo pa e tankinan aki desde 3 di januari 2026. Maske na inicio tabatin un posicion fuerte di parti di Gobierno pa desmantela e infrastructura aki, e perseverancia di esnan cu tabata mira e balor den e tankinan a triunfa.
Un cambio positivo pa finansas publico
E decision pa no desmantela, sino pa saca e tankinan den destaho pa almacena petroli, ta wordo mira como un movecion sumamente positivo pa Aruba. Segun calculonan inicial, e operacion aki tin e potencial di genera rond di 70 miyon florin pa aña pa caha di Gobierno. Esaki ta representa un entrada extra structural cu por wordo inverti bek den nos comunidad.
Speransa den sector priva
Cu e destaho aki oficialmente habri, tur wowo ta poni riba e mercado internacional. E meta awor ta pa acapara atencion di companianan serio y capacita cu por haci uzo eficiente di e facilidadnan na Zeewijk.
E cambio di rumbo aki ta demostra cu ora tin bista riba e interes general di nos isla, por yega na solucionnan cu ta beneficia nos economia y nos futuro. Ban spera cu pronto Aruba por mira e frutanan di e inversion y e actividad comercial nobo aki na Zeewijk.
Gobierno a bay para awor tras di e vision di MEP, cu mester busca forma pa activa a tankinan aki.
Aruba, e futuro ta den nos man!
