Diasabra mainta, na oficina di Serlimar na San Nicolas, Gobierno di Aruba a duna inicio oficialmente na Dia Nacional pa Cuida Aruba. Prome Minister Mike Eman, hunto cu Minister Arthur Dowers, a invita henter comunidad pa uni forsa y contribui na un Aruba mas limpi, bunita y agradabel pa biba aden. Durante e apertura, Prome Minister Eman a expresa su satisfaccion cu e cantidad grandi di persona cu, desde trempan, tabata activo den diferente parti di Aruba. El a gradici e trahadonan di Serlimar, e contratistanan, e organisacionnan, e clubnan di servicio, e boluntarionan y tur instancia cu a pone personal, material y otro recurso disponibel. “Nos ta invita henter comunidad pa sali, lora manga y haci tur rond Aruba limpi: nos barionan, nos casnan, e centronan deportivo, e areanan publico, e zonanan comercial y centro di ciudad,” Eman a bisa. Segun e prome minister, e campana ta un oportunidad pa ciudadanonan, Gobierno y sector priva demostra nan carino, energia y dedicacion na Aruba.
Actividadnan den henter Aruba
Pa facilita e operacion nacional, a reparti baki pa desperdicio na 26 sitio rond di isla. Diferente instancia y compania a contribui cu baki, vehiculo, personal y otro tipo di sosten Entre e instancianan menciona durante e apertura tabatin Serlimar, DOW, WAP, SETAR, APA, EcoTech, CMO y diferente organisacion comunitario y comercial. E accion di Serlimar lo concentra principalmente den San Nicolas, mientras cu otro grupo y organisacion lo atende diferente bario, cancha deportivo y espacio publico rond Aruba. Tambe a pidi ciudadanonan pa consulta e informacion oficial tocante cua tipo di desperdicio por deposita den cada baki riba www.arubatanostur.com
Un solucion cu mester ta duradero
Minister Arthur Dowers a felicita tur persona y instancia cu a coopera cu e iniciativa. El a enfatisa cu limpia Aruba durante un solo dia no ta suficiente y cu e problema di desperdicio mester wordo atende di un manera structural. Minister Dowers a splica cu Gobierno a prepara un decreto cu participacion di diferente ministerio, entre nan Ministerio di Asuntonan General, Ministerio di Husticia y otro ministerionan cu tin responsabilidad pa maneho di desperdicio y espacio publico. Un comision nacional lo sigui coordina e trabou. Den futuro, otro grupo y instancia por wordo agrega na e comision pa contribui na un solucion duradero. Segun e mandatario encarga cu e cartera di husticia, e maneho mester inclui informacion, educacion, asistencia y, ora ta necesario, sancion. E meta ta crea mas consciencia cu Aruba ta pertenece na nos tur y cu cada ciudadano tin e responsabilidad pa cuide.
Agradecimento na comunidad
Durante e incio di Dia pa Cuida Aruba, a haci mencion special di e trahadonan cu, a pesar cu pa hopi hende tabata un dia liber, a presenta nan mes pa sirbi comunidad.
Tambe a expresa palabranan di sosten na Tico Tromp, kende recientemente a sufri un accidente haciendo nos isla limpi, y a desea cu e por recupera pronto. Gobierno a gradici prensa y tur e organisacionnan cu, durante e dianan anterior, a divulga e campana y motiva boluntarionan pa participa. Dia Nacional pa Cuida Aruba tin como meta no solamente limpia e isla, sino tambe fortalece consenshi y responsabilidad colectivo. E mensahe central di e iniciativa ta cu cuida Aruba ta responsabilidad di nos tur y cu cambio duradero ta cuminsa cu accion den cada bario.
