Contrario na e maneho di antes cu nos pais conoce, por mira cu poco poco tin un maneho mas habri cu ta bini cu cambionan y normal nobo. Gobierno a publica cu el’a duna permiso pa tur tienda por keda draai normal riba e fechanan cu mundo ta considera fechanan santo. Ta e fechanan di mas sagrado pa mundo, unda ta para keto en memoria di morto di Cristo, ora cu pa 3.or Cristo a muri. Grandinan di antes nan tabata bisa cu e dia aki no mag di labora, ni tampoco bay den actividadnan, manera lama, etc. E ta un dia sagrado y intocabel y di refleccion.
Pa hopi aña Aruba tabata plat riba Viernes Santo y mas aun pa 3.or di atardi unda ta reina silencio profundo.
Bao maneho di Gobiernonan di MEP di pasado, a prohibi pa tiendanan por habri riba viernes santo. Ex Minister Rudy Croes tabata fuerte den su decisionnan cual a causa cu cierto comerciantenan a acudi na corte, bisando huez cu nan no ta kere den Jesus, pero nan ta kere den clabo y olifanti.
E situacion a cambia poco poco y awendia, un otro Gobierno di MEP no ta considera e fecha aki como sagrado mas y ta duna permiso pa tur supermarket por ta habri, gasolin station, malls, hardware stores etc.etc.
Mas cu claro cu pa siguidornan di Cristo, esaki ta wordo mira na un manera, pero pe otro mundo (comercial) ta wordo mira na otro forma.
Hecho ta cu e serenidad pa cu e dianan aki, poco poco ta bay perdi.
