A base di dialogo cu Secretario di Estado sr. Knops
ORANJESTAD – Manera cu ta conoci dialuna 13 di december a tuma luga e ultimo reunion entre sindicatonan SADA, SIWA, UEA, OPPA, SPA, VWI, ALVAST, STT, FTA, SIMAR, SEPPA y Gobierno di Aruba. E reunion aki a tuma luga mientras cu trahadonan di sector publico y semi publico tabata manifesta entre otro pa para e recorte di 12.6% den nan salario. E decision cu a tuma ta cu Gobierno lo dialoga cu Hulanda y contesta e peticion diaranson. Sinembargo Hulanda a indica cu te diabierna por atende e peticion cual ta pone cu Gobierno no tin un contesta ainda riba e peticion di sindicatonan.
Na diferente ocasion Prome Minster a splica cu no ta keda na Gobierno di Aruba pa para e recorte na e momentonan aki como cu e ta den man di Hulanda. Locual a inicia como un muestra di solaridad y ayudo financiero pa esnan cu mas tabatin necesidad di dje na momento cu Covid a yega Aruba, awor ta un condicion di parti di Hulanda pa Aruba sigui ricibi e sosten di likides cu nos isla tin necesidad di dje.
No obstante e situacion aki, Gobierno di Aruba ta desea pa cada trahado publico por ricibi nan salario completo. Pa cual ta haye importante pa reuni cu sindicatonan y cu Hulanda pa yega na un solucion mas pronto cu ta posibel.
Despues di a dialoga ampliamente cu Secretario di Estado sr. Raymond Knops, Gobierno ta pone sindicatonan na altura di carta di sr. Knops cu ta indica cu diabierna Hulanda lo tuma un decision riba e peticion aki di Aruba. Pa cual Gobierno di Aruba no por contesta e peticion di sindicatonan den e tempo acorda, sino despues di diabierna venidero unabes cu Hulanda trata e peticion aki.
Gobierno di Aruba ta keda habri pa continua den dialogo cu sindicatonan pa yega na un acuerdo mutuo den cuadro di e tema di e recorte salarial.