ORANJESTAD — Un documento cu a sali na luz ta mustra claramente con e gobierno nobo di AVP-Futuro a cuminsa su mandato cu un gasto innecesario y ofensivo pa e pueblo Arubano. Segun e lista di gasto, nan fiesta di inauguracion riba 4 di april 2025 na Plaza Padu a costa un suma asombroso di Afl. 101,982.62.
Den un pais caminda hopi hende ta luchando pa sobrevivi, pa paga nan utilidadnan y pa por cumpra cuminda, e gobierno a tuma su prome gran decision : un fiesta luhoso cu gasto di Afl. 34,229.50 pa stoel, mesa, tentanan, mata y palmita decorativo y catering, y un otro gasto di Afl. 50,232.25 pa podium, luz, generator y instalacionnan audio/visual.
Ademas, cu bandanan, DJ, steelband, carnavaldansernan y hasta publicidad den social media y gepin riba homepage, e suma total casi pasa 102 mil florin.
E mes gobierno cu a gana eleccion cu un mensahe di esperanza pa un Aruba cu ta enfrenta pobreza y crisis, a eligi pa gasta un dineral pa celebra su yegada na poder. Un acto cu hopi cuidadanonan ta considera como un klap den cara di tur esnan cu ta pasa necesidad.
Mientras cu hende ta warda ayudo, wardando cas, gobierno a pone prioridad riba un banquete y show pa nan mes.
Un pais den “crisis” merece lider cu ta pone pueblo prome, no placer y show. Nan a gana eleccion cu e mensahe di “costo di bida”, y “pobresa”, y awor cu nan a yega na poder, nan por a haci donacion na esnan den necesidad.
