/// Cuater director nombra contra tur regla y acuerdo….
Oranjestad – Aruba ta testigo di un acto cu ta contradici directamente e mes compromiso cu gobierno AVP-Futuro a haci cu pueblo den nan programa di gobernacion 2025-2028, esta e acuerdo di gobernacion 2025-2028. Mientras cu den papel a promete transparencia y bon gobernacion, e realidad ta mustra algo hopi diferente.
Den e programa di gobernacion, AVP-Futuro a expresa cla cu lo: “introduci perfil di funcion, proceso transparente di solicitud y nombramento di director y comisario.” – “Nombra director y comisario basa riba profesionalismo, educacion, experiencia y imparcialidad…”
Un compromiso cla pa pone fin na nombramento politico y cu director y comisario lo wordo nombra despues di un proceso husto y habri. Pero kico nos a mira e siman aki? Cuatro nombramento na puesto di director den companianan estatal sin ni un proceso di solicitud. No a wordo habri ningun vacatura, no a wordo haci ningun procedimiento di evaluacion publico, y no a wordo busca e candidato miho a base di merito. E nombramento ta di manera cu nos ta bisa: “baha cu parachute”.
Un pueblo cu tabata spera cu por lo menos e gobierno nobo lo sigui e bon ehempel di Gobierno di MEP, ta sinti su confianza traiciona, cu e anuncionan di e cuater directornan. E promesa di: “good corporate governance”, “proces transparente di solicitud”, “profesionalismo y imparcialidad”, ta keda so riba papel.
Solo di Pueblo ta exigi un contesta cla di Minister Gerlien Croes y Minister Mike Eman: Con esaki por pasa? Unda e proceso transparente ta cu boso mes a priminti? Unda e respet ta pa bon gobernacion?
Pueblo ta wak y pueblo ta recorda. Aruba merece un gobernacion cu cumpli cu su palabra, no cu ta bai contra loke a firma y a presenta den programa di gobernacion.
Pa no laga ningun duda, nos ta publica aki e parti den e programa cu a keda viola dor di nan mes!
