Minister di Finansa, Asunto Economico y Sector Primario, Geoffrey Wever, acompaña pa Prome Minster Mike Eman y Minister di Infrastructura, Rene Herdé, a anuncia oficialmente e apertura di un destaho publico pa selecciona un bureau di arkitectura pa elabora un diseño integral pa e proyecto di embeyecemento di Wilhelminastraat y su vecindario.
E proyecto ta forma parti di e esfuerzo continuo di Gobierno di Aruba pa revitalisa e centro di Oranjestad, stimula comercio y stimula cu Oranjestad ta bira un centro tin vivienda, gastronomia, oficina y retail.
E meta di e destaho ta pa diferente arkitecto entrega nan plan visual pa e area y despues un comision consistiendo di Gobierno di Aruba y sector priva lo scohe e plan mas bunita y mas integral pa e arkitecto cu gana e proyecto por prepara e diseño final, bestek y demas documentonan cu ta necesario pa por ehecuta e trabou di construccion.
E iniciativa ta abarca e area di Wilhelminastraat number 49/62 te cu e crusada Wilhelminastraat/Kazernestraat (excluyendo Plaza Daniel Leo), y tambe e zona di Klipstraat/Oranjestraat, incluyendo Rifstraat y Schoolstraat.
E diseño cu lo sali for di e encargo aki lo sirbi como base pa implementacion di un plan di embeyecemento structural y estetico, cu tin como meta pa haci Oranjestad mas atractivo pa comerciante, bishitante y ciudadano.
“Nos ta sigui pone enfoke riba un Oranjestad moderno, vibrante y sostenibel. E destaho publico aki ta un paso concreto den e proceso di renobacion urbano cu nos a compromete nos mes pa realiza,” Minister Wever a declara.
- Plaso di ehecucion: 80 dia di trabou efectivo despues di emision di e carta di asignacion.
- Disponibilidad di werkomschrijving: desde 17 october 2025, na Dienst Openbare Werken (DOW), na un costo di Afl. 250,00. Pago lo mester wordo haci na e cashier di DOW.
- Reunion di informacion: 23 october 2025, ora 10.00 di mainta, na DOW.
- Nota di Inlichtingen: 30 october 2025.
- Destaho publico: 7 di november 2025, ora 11.00 di mainta, den oficina di e Director di DOW.
Rekerimento pa inscripcion
E companianan interesa mester presenta:
- Prueba di inscripcion na Camara di Comercio di Aruba (no mas bieu cu 6 luna).
- Copia di identificacion di e directornan di e compania.
- Copia di declaracion di DIMP.
- Tur otro documento indica den e descripcion di trabou.
Inscripcion mester wordo haci usando e formulario oficial cu ta inclui den e descripcion di trabou y cu ta autentica.
Un compromiso pa un centro urbano sostenibel
Cu e destaho publico aki, Gobierno di Aruba ta reafirma su compromiso den e Programa di Gobernacion AVP-FUTURO 2025-2028 pa revitalisa e centro di Oranjestad, creando espacio pa crecemento economico y bienestar di nos comunidad
