Minister Gerlien Croes a firma un otro MoU mas cu un otro universidad di Merca pa brinda studiantenan mas opcion pa studia na Merca. Esaki ta amplia e opcionnan pa studiantenan di Aruba ainda mas. Recientemente Minister Gerlien Croes a firma acuerdonan cu SUNY New Paltz na New York, cu Husson University na Maine y cu Monroe University na New York. Esaki ta amplia e opcionnan na mas estado na Merca.
Siguientemente lo elabora un tiki mas riba e acuerdonan cu tin caba cu universidadnan na Merca pa asina studiantenan por tin esaki na nan alcanse.
Gobierno di Aruba actualmente tin acuerdonan cu Coastal Carolina University y University of South Carolina. E dos universidadnan aki na South Carolina ta brinda studiantenan di Aruba “in-state tuition” cu ta ensera un descuento compara cu loke ta cobra studiantenan internacional.
Wayne State College ta situa na Nebraska y actualmente tin 7 studiante full-time haciendo diferente programa di Bachelor. Wayne State College ta un opcion menos caro por medio di e acuerdo cu ta otorga “in-state tuition”. Wayne State College por habri opcion pa transfer pa otro universidadnan mas grandi.
Na Maryland, Gobierno di Aruba tin un acuerdo desde 2016 cu St. Mary’s College. E acceso na Washington DC y tur loke e ta ofrece ta haci esaki interesante pa un studiante cu ta studia na St. Mary’s. Aunke no hopi, St. Mary’s den pasado a atrae studiantenan Arubiano pa nan bachelor-program. Actualmente Gobierno di Aruba ta den combersacion cu St. Mary’s pa un descuento cu por haci cu e Arubalening por cover e gastonan di estudio y vivienda.
Estado di New York ta un estado cu ta hopi popular bou di studiantenan Arubiano. Un total di 10% di studiantenan cu Arubalening ta scoge pa un universidad of college na New York State. Recientemente Gobierno di Aruba a cera un acuerdo cu SUNY New Paltz. Den corto tempo Gobierno a firma un acuerdo cu Monroe University na New Rochelle tambe, un universidad cu ta 30 minuut leuw di New York City. Esaki ta un universidad na cua studiantenan di Aruba y Corsou ta combinando nan estudio cu deporte.
Den e estado mas nort cu ta Maine, Gobierno di Aruba recientemente a cera un acuerdo cu Husson University. Husson University lo duna studiantenan di Aruba un descuento pa e Arubalening por cover gastonan di estudio y vivienda. Husson ta reconoci pa su enfasis riba experiential learning. Husson ta ofrece mas di 100 programa pa bachelor’s, master’s y PhD. Specificamente, Husson ta ofrece pa studiantenan cu kier sigui den audio, video of graphic design, estudionan manera Audio Engineering, Video & Film Production y Graphic & Visual Design. Ademas Husson University ta un Division III den NCAA pa studiantenan cu kier combina un estudio cu deporte.
Por ultimo, tin e estado di Florida. Den e estado di Florida tin un promedio di 35 studiante cu Arubalening, sin conta studiantenan cu ta bai riba nan mes. E estado di Florida pa hopi aña a brinda studiantenan di Aruba e posibilidad pa “in-state tuition” na su universidadnan publico, manera University of Central Florida. Banda di esaki hopi studiantenan di Aruba ta scoge un community college cu ta mas barata cu un university y ademas ta yuda e studiante drenta mas lihe den un universidad renombra. Community Colleges popular bou di studiantenan di Aruba ta Valencia College cu ta traha hunto cu University of Central Florida y Tallahassee Community College cu ta traha hunto cu Florida State University. Door di e ambiente politico, e gobierno di Florida a pone un pausa na e “in-state tuition” pa studiantenan internacional. Asina mes universidadnan ta brinda otro tipo di scholarship pa asina keda atrae studiantenan di Aruba. Pa studiantenan interesa den STEM of aviacion, Aruba tin un acuerdo cu Florida Institute of Technology cu ta duna 50% di descuento riba su tuition. Esaki ta haci cu e Arubalening ta cubri mayoria di e gastonan di estudio y vivienda.
Banda di e acuerdonan aki, gran cantidad di studiantenan cu Arubalening ta scoge pa otro estadonan na Merca. Motibonan pa esaki ta pasobra a haya un athletic scholarship, of por a transfer pa un miho tuition, tin studiante cu ta haci nan Master caminda nan a haci nan stage of tin cu kier descubri lugarnan nobo.
Cu e MoUnan actual y e presencia di Education USA cu Minister Gerlien Croes a renoba, gobierno di Aruba ta sigui guia y haci e esfuerzo pa brinda studiantenan di Aruba otro opcionnan banda di studia na Hulanda of den region.
