Diamars 10 di juni, Gobierno di Aruba, representa pa Prome Minister, mr. Mike Eman, a asisti na e celebracion anual di Dia di Camões, celebra na Wilhelmina Park. E celebracion, cu ta honra e herencia cultural, patriotismo y balornan nacional di Portugal, a trece lidernan politico, Presidente di Parlamento, Cuerpo Consular, Consul Honorario di Portugal, y miembronan distingui di e comunidad Portuges na Aruba, hunto.
Durante e celebracion, Prome Minister a expresa su profundo respet y admiracion pa e comunidad Portuges na Aruba, cu mas di 60 aña pasa a inmigra y forma un bida nobo riba nos isla. For di e isla di Madeira, gran parti di e migrantenan Portuges a traha un futuro na Aruba a base di trabao duro, fe y amor, un herencia cu ta biba te awe den e generacionan nobo.
“Na momentonan cu ta haya e oportunidad pa conoce di cerca, famianan Portuges y amistadnan Portuges, bo ta reconoce e calor di nos isla, e sentido di convivencia, e simpatia y solidaridad”, Prome Minister Eman a bisa den su discurso. E sentido di convivencia, respet mutuo y solidaridad ta fortifica nos pueblo.
Gobierno di Aruba ta reconoce cu e comunidad Portuges a haci un contribucion fundamental den cada aspecto di desaroyo di nos isla. For di posicionan di liderato den gobierno, justicia, educacion y cultura, te infrastructura y economia, talento Portuges a yuda desaroya e Aruba di awe.
Pa Aruba e ta un orguyo cu por conta riba un comunidad cu tanto dedicacion, disciplina y amor pa nos isla. Nan no solamente a trece man di obra y conocemento, pero tambe e calor isleño cu ta caracterisa nos identidad como un pueblo habri y comprensivo.
E celebracion di Dia di Camões ta un recordatorio poderoso di con migrantenan por contribui positivamente na un comunidad. Gobierno di Aruba ta reafirma su compromiso pa sigui honra y integra e balornan cu comunidadnan manera esnan di Portugal ta trece, y pa sigui traha hunto riba un futuro mas husto, prospero y solidario pa un y tur cu a haci Aruba nan hogar.
