Ayera mainta, Prome Minister Mike Eman, Minister di Husticia Arthur Dowers y Minister di Finansa Geoffrey Wever a firma un convenio cu Algemeen Pensioenfonds Aruba (APFA) pa introduccion di NPR FIT, un areglo di pensioen destina pa contractantenan den servicio di Gobierno di Aruba.
E firmamento di e convenio ta marca un paso importante den e esfuersonan pa ofrece e grupo di trahadonan aki mas siguridad financiero pa nan futuro, garantisando cu nan tambe por participa den un sistema di pensioen cu ta contribui na nan bienestar despues di nan trayectoria laboral.
Durante e acto di firma, Minister Dowers a reflexiona riba e trayectoria cu a conduci na e momento aki, recordando cu e discusionnan relaciona cu futuro di sistema di pensioen na Aruba tabata forma parti di e agenda gubernamental desde e prome gabinete Eman na 2009.
Segun Minister Dowers, desde e periodo ey tabata existi e necesidad pa atende e situacion di pensioen y busca solucionnan cu por ofrece mas siguridad na trahadonan. E proceso a exigi tempo, dialogo y determinacion, pero awe e esfuersonan aki ta resulta den un paso concreto pa un grupo di trahado cu durante hopi aña no tabatin e mesun oportunidad di participa den un areglo di pensioen.
Minister Dowers a pone enfasis riba e rol di Prome Minister Mike Eman, kende a mantene e determinacion pa sigui traha riba e asunto aki, y a expresa su reconocemento na APFA pa e responsabilidad cu e fondo ta asumi den garantisa futuro di pensioen di trahadonan.
Un aspecto importante cu Minister Dowers a enfatisa ta e dialogo amplio cu a tuma luga durante e proceso. Segun e mandatario, netamente e dialogo y cooperacion entre e diferente partidonan involucra a contribui na e resultado cu awe a formalisa.
E introduccion di NPR FIT ta di importancia particular pa contractantenan di Gobierno, mirando cu e areglo aki ta ofrece nan e oportunidad pa construi un pensioen y asina tin mas siguridad financiero den futuro. E participacion den un fondo di pensioen no solamente ta beneficia e trahado individual, sino tambe su famia y e comunidad en general.
Minister Dowers a señala cu e contribucionnan na un fondo di pensioen tin un impacto mas amplio riba desaroyo economico y social di Aruba. E recursonan cu ta acumula den un fondo di pensioen por contribui na inversionnan cu ta beneficia e pais y comunidad, mientras ta mantene e responsabilidad principal di garantisa pensioen pa e participantenan.
Den su calidad di minister responsabel pa personal di Gobierno, Minister Dowers a expresa su satisfaccion cu e acuerdo logra, enfatisando cu siguridad di pensioen ta un aspecto importante di bienestar y proteccion di trahadonan.
Minister Dowers a felicita Prome Minister pa su vision y tambe Minister Wever pa su esfuerso haci pa yega na e firmamento di NPR FIT. Ademas a felicita tur esnan cu a contribui na realisacion di e acuerdo aki, incluyendo directiva y bestuur di APFA, y a expresa su speransa cu e paso aki ta contribui na un sistema di pensioen mas inclusivo y sostenibel pa futuro di Aruba.
Cu e firmamento di e convenio NPR FIT, Gobierno di Aruba y APFA ta formalisa un paso den direccion di mas siguridad di pensioen pa contractantenan di Gobierno, reconociendo e importancia di ofrece trahadonan un perspectiva financiero mas stabiel despues di nan añanan di servicio.
