Awe mainta Corte di Husticia a dicta sentencia den e caso di daño cu Mansur, Nuñez y Werleman a cuminsa contra Gobierno relaciona cu caso Avestruz. Den caso Avestruz, Hof di Corte Superior a declara Mansur, Nuñez y Werleman liber.
SOLO DI PUEBLO por a compronde cu Hues a rechaza e demanda di Nuñez y Werleman pa e tempo cu nan tabata sera pa e caso Avestruz. Hues a aproba e demanda di Nuñez, Werleman y Mansur pa e demanda pa Gobierno paga e gastonan di abogado.
CUMINSA CASO CONTRA GOBIERNO PA DAÑO
Na Mei 2024, den e caso di apelacion di Avestruz, Procurador General, a exigi pa mantene e sentencia pa Nuñez, Werleman, Mansur cu ta 2 aña di prison di cual 1 aña ta condicional cu 3 aña di prueba. Tambe un boet di 25 mil florin.
Dia 12 di Juli 2024, Hof a dicta sentencia caminda cu Hof a bisa cu e no ta haya cu tin malversacion di Gobierno cu e terenonan cu a bende pa hopi placa. Na opinion di Hof, no por bisa cu Mansur, Nuñez y Werleman no kier a desaroya nan proyectonan. Hof no ta haya proba cu conhuntamente cu Sevinger, Mansur, Nuñez y Werlema a malversa Gobierno. Hof a declara Mansur, Werleman y Nuñez liber di malversacion di Gobierno.
A base di decision di Hof, tres sospechoso a cuminsa caso di daño contra Gobierno. Den e caso di Mansur ta pa e gastonan di abogado. Den e caso di Werleman y Nuñez ta e gastonan di abogado y daño per juicio pa e dianan cu nan tabata encarcela pa caso Avestruz.
MESTER PAGA
Hues den su sentencia, a rechaza e demanda di daño per juico pa e dianan cu Werleman y Nuñez tabata encarcela. Hues a aproba e demanda pa Gobierno paga e gastonan di abogado pa Mansur, Werleman y Nuñez. Awor Gobierno lo mester paga tur e gasto cu Mansur, Nuñez y Werleman tabatin cu nan abogado.
