GOBIERNO: PRIORIDAD TA ROBEZ ATROBE?!
Fiesta NO ta e solucion ora bo hendenan di Aruba mester entrada den nan saco.
Ora bo tata ni bo mama, esta bo mayornan no tin placa of ta kremencha pa mantene ful un famia, e ta limita kiko nos ta haci, hala faha mara of pa comprende mihor, nos ta spaar tur entrada cu tin y biba net net. Bo ta mira kiko bo por bai haci pa genera entrada cu ta trabounan honrabel pa asina yuda bo cas y bo famia prome. Esaki ta logico toch? Bo no ta stroba un persona di haya trabou, bo no ta stroba un persona ricibi pago pa su trabou haci of genera entrada di un manera corecto pa bo beneficio.
Ora Pais Aruba no tin placa, y no ta hayando ayudo di Madre Patria tampoco anto algo no ta bon. Kiko nos ta enfrentando, kiko ta e acuerdo haci tempo cu a firma e acuerdo di Status Aparte? A wordo bisa cu nos lo tin nos autonomia pa cuanto tempo? Kiko ta e areglonan cu a wordo haci? Si e acuerdo aki a duna un tempo difini pa Aruba pertece bek na Madre Patria of si encaso e no por cumpli cu e rekesitonan pa keda independiente? Ta preguntanan cu lo keda den aire, pasobra nos no tin nos Arubiano cu nos mester ta orguyoso di dje manera Betico Croes cu a sigi cu e lucha cu señores Eman tambe a bringa pa e mesun motibo. Awor ta di comprende cu nos tin un pueblo dividi pa orguyo ken a haci kiko, ken a haci kiko pa ken, ken a keda debe ken.
Cu tur respet na tur e gobernantenan y parlamentarionan, boso ta skucha boso pueblo?! Boso no ta riba e mesun liña shonan. Nos ta exigi respet como pueblo, un pueblo preocupa. Basta aña a boga pa traha riba area social, a pidi pa traha riba nos generashon di hendenan grandi, a pidi pa yuda genera mas entrada pa esnan cu mas mester di dje, mientras nos tin cu siña spaar, nos tin cu yuda comunidad, cuanto ta esnan sin entrada, sin trabou y awor kier bin cu un CARNAVAL!?
Cu tur respet excelencia Sra. Xiomara Maduro Minister di Cultura y Finanzas y Sra. Ronella Croes Directora di Aruba Tourism Authority, boso prioridad ta hopi robez. Nos tin entendi cu ATA ta administra e entrada di AHATA cual ta un percentahe di e impuesto riba kamber cu ta destina pa promocion di Aruba.
E notica di Carnaval a baha hopi amargo na cas den nos hogar, mescos cu den hopi otro hogar na Aruba. Desaroyo di Aruba ta inclui desaroyo di nos hendenan en general. Hendenan cu a perde nan famianan, banconan cu a kita auto of cas di nos hendenan, ainda tin hopi departamentonan sin nan permiso, problematica den nos hobenan cu tin depresion no solamente pa isolacion sino ta bai mas lew cu esaki.
Por tabata tin otro solucion pa nos musiconan y no laga nos bolbe bai den situashon cu apensas ta saliendo di dje. Tuma ehempel di Grupo di Champagne, un actividad sera, un actividad cu varios grupo di carnaval, tuma ehempel di Bochincha un lugar habri haciendo diferente eventonan cu diferente gruponan di musico. Con hende por celebra si nan a dera nan hendenan, con hende por celebra cu ainda nan no tin trabou, con hende por celebra cu ainda no tin entrada? Con hende por celebra si ainda hende debe otro hende? Cana den bo pueblo y sinto dolor di tur hende. Mira cuanto hende ta bende nan articulonan diariamente, bende cuminda, bende nan animalnan pa asina genera extra entrada. Hopi Fout!
Mi hogar, mi tata esta Dr. Rory Arends un pionero di turismo ex director di ATA y AHATA ta e persona cu mi ta dialoga cu ne entre otro, e ta un persona cu conocimiento amplio ainda, cu tabata na comienso den e Tourism Council pa Gobierno di Aruba y nos no ta di acuerdo cu mientras pais Aruba ta pasando den situashon precario, tin guerra por start na cualkier momento otro caminda di mundo, bo tin hendenan ta bringando pa nan entrada, bo tin desacuerdo entre Madre Patria y Aruba, debenan ta creciendo pa laga pa nos y generashonan cu ta sigi.
Mi a critica constructivamente e gobernashon di Gabinete Eman ora nan prioridad tabata robes den algun ministerio y mesun cos mi ta critica tambe e gobernashon di Gabinete Wever-Croes den e decishon aki pa e Ministerio menciona. Mi ta pidi excelencia Prome Minister Sra. Evelyn Wever-Croes cu tur respet, intermedia den e decision aki.
Abigael Arends – Profesional den Area di Turismo, Maneho di Evento en General, Desaroyo Profeshonal, Derecho Humano y Ley di Labor Internacional.
