Cu e compromiso continuo pa revitalisa San Nicolas, dialuna mainta a tuma luga e groundbreaking oficial di fase 1 di renovacion di e stacion di bus na San Nicolas. E acto a tuma luga na presencia di Minister di Husticia, temporalmente responsabel cu Infrastructura, mr. drs. Arthur Dowers, y Minister di Finansa y Economia mr. Geoffrey Wever.
Minister Dowers, cu ta encarga cu infrastructura, a enfatisa cu e renobacion di e stacion di bus ta mas cu simplemente un proyecto di construccion. San Nicolas merece inversion continuo, pa por duna un impulso economico anhela. E prome fase ta encera remodelacion di henter e area di stacion di bus, cu lo tin dos fase.
E prome parti lo dura cinco pa seis siman y ta inclui:
- Renoba y modernisa e stacion di bus y e area;
- Construccion di un Farmer’s Market na e parkeerplaats cu lo cay bao maneho di Santa Rosa;
- Instalacion di un speeltuin entre e edificio di SETAR y Post Aruba.
Minister Dowers a reconoce cu den pasado, proyectonan pa San Nicolas a tuma mas tempo cu ta desea, pero a expresa cu esaki a cambia y cu resultado ya ta visibel.
Minister Geoffrey Wever, ta trahando duro pa balansa e desaroyo economico riba henter e isla, y a splica cu tin un bon alineacion entre e vision pa San Nicolas den e coalicion actual. E vision pa traha e vierbaansweg, restaura monumentonan y e reanimacion di turismo cultural, ta alinea cu e vision di e partner di coalicion y ta forma parti di e plan di Gobernacion. “Nos ta traha pa hiba San Nicolas bek den su añanan di gloria.”
E renobacion di e stacion di bus ta parti di un plan amplio pa revitalisa e ciudad:
- Renobacion di caminda, cayanan y espacionan comun
- Promocion di desaroyo economico local
- Impulso di turismo y comercio
- Inclusion di tur ciudadano den e rikesa di nos Pais.
Gobierno tin e compromiso profundo pa mehora e calidad di bida di e habitantenan di San Nicolas y ta traha cu firmesa pa crea un ciudad cu ta florece, ta sostenibel y cu ta comparti e rikesa economico.
