Dialuna 28 di april, Minister di Husticia, hunto cu Departamento di Obra Publico (DOW) y varios ploeg di limpiesa, a reuni den Columbusstraat pa duna inicio oficial na un accion di limpiesa intensivo den centro di ciudad. E iniciativa aki ta parti di un esfuerso pa combati e consecuencia di negligencia durante di e ultimo añanan di e gobierno anterior.
Tur rond di centro di ciudad, ta remarcabel e cantidad di sushi y yerba cu ta crece pa nan cuenta, situacion cu no ta digno pa un ciudad turistico. DOW ya a cuminsa traha pa limpia e area, kita yerba y sushi, y haci limpiesa general den centro di ciudad.
Ta lamentabel cu apenas algun tempo despues di renovacion di e area, por mira e situacion cu a bay for di man. E falta di mantencion ta mustra claramente un negligencia di pasado. Gobierno anterior tabata gaba cu surplus financiero, pero realidad ta cu hopi area esencial tabata sin mantencion. Surplus sin inversion den infrastructura no ta un logro, sino un sintoma di falta di vision pa futuro di nos pais.
Minister Dowers ta enfatisa cu mantencion di nos areanan publico limpi no ta solamente un responsabilidad di autoridadnan competente, pero tambe di cada cuidadano y comerciante. Cada doño di edificio tin e responsabilidad pa cuida e espacio dilanti su propiedad. Clientenan no mester cana entre sushi pa por drenta un negoshi. Ademas, edificionan bandona ta representa un peligro, cu material cu por cay y pone riesgo pa esnan cu ta pasa, pa cual ta urgi e doñonan pa mantene esakinan.
Minister Dowers, encarga temporalmente cu e cartera di Infrastructura, a enfatisa cu lo haci un evaluacion hunto cu DOW riba nan funcionamento pa optimalisa eficiencia y implementa un plan di mantencion continuo y structura pa centro di ciudad y otro areanan.
Nos comunidad y bishitantenan merece un Aruba limpi, sigur y digno. E accion di limpiesa di awe ta apenas e comienso. E trabao lo sigui y lo intensifica pa logra un Aruba mas limpi, sigur y dushi pa biba.
