Diasabra mainta Prome Minister mr. Mike Eman, hunto cu e boluntarionan di Ministerio di Asunto General, a cuminsa oficialmente cu un proyecto di embeyece Bernhardstraat na San Nicolas. E prome cas cu a verf tabata Bernhardstraat 170, cas di famia Vorst. E iniciativa ta forma parti di e vision mas amplio pa revitalisa San Nicolas y fortalece e orguyo di e bario. Segun Prome Minister Eman, durante e bishitanan di Accion di Bario den e area, Gobierno ta considera cu Bernhardstraat ta un di e avenidanan principal di San Nicolas, cu diariamente residente, turista sea den taxi, bus of auto di huur ta uza pa yega hotel den e area. “E ta un caminda hopi importante pa San Nicolas. Ora hende drenta e districto, nos kier pa nan sinti e calor, e cariño y e orguyo di e comunidad,” Eman a expresa. Durante e preparacion di e proyecto, e funcionarionan di Ministerio di Asunto General a bishita cas pa cas pa dialoga cu e habitantenan y identifica e oportunidadnan pa mehora e aspecto visual di e caya. Te awor, 17 cas a registra pa participa den e iniciativa.
Glenda Tomasia di Ministerio di Asunto General a splica cu e proyecto a nace for di e deseo pa duna e area un aspecto mas vibrante y bunita. E colornan selecciona ta busca pa resalta e caracter unico di San Nicolas y crea un ambiente mas atractivo tanto pa residente como pa bishitantenan. Ingrid Vorst, propietaria di e prome cas cu a verf diasabra mainta, a expresa su entusiamo cu e iniciativa. Segun dje, e cambio ta importante no solamente pa e aspecto fisico di e bario, sino tambe pa e actitud y orguyo di e habitantenan. “Nos mester traha hunto pa cambia e manera cu nos ta mira nos bario. Ora e habitantenan mira e cambionan, esey ta motiva otro persona pa contribui tambe,” Vorst a comenta.
Raoul Gravenstijn tambe di Ministerio di Asunto General a indica cu e reaccionnan te awor ta sumamente positivo. Segun Gravenstijn, diferente empresa y miembro di comunidad ya a expresa interes pa contribui n’e proyecto por medio di sponsor material of adoptando un cas. “E efecto positivo ta contagioso. Hende ta mira cu e proyecto ta algo bunita y nan kier participa. Nos kier pa Bernhardstraat bira un ehempel con nos comunidad y gobierno por traha hunto pa logra resultado concreto,” Gravenstijn a remarca.
E proyecto ta conta cu apoyo di varios boluntario cu lo dedica nan tempo liber pa realisa e trabounan di verf durante fin di siman. E meta ta completa e promenan 17 cas registra y gradualmente expande e iniciativa pa otro partinan di San Nicolas.
Prome Minister Eman a enfatisa cu e proyecto ta complementa otro inversion cu Gobierno ta realisa den San Nicolas, incluyendo renovacion di e casnan, mehoracion di infrastructura, espacio publico y proyecto comunitario. “Nos no ta papia solamente di renoba. Nos ta haci. Nos ta pone man na obra hunto cu comunidad. E cambio cu nos kier mira den San Nicolas ta cuminsa cu accion concreto y cu e personanan dispuesto pa contribui na nan bario,” Eman a conclui.
Gobierno ta invita cualkier empresa y/of organisacion cu kier contribui n’e iniciativa pa tuma contacto cu Ministerio di Asunto General na telefon 528-4900 of minaz@arubagovernment.aw pa explora posibilidad di apoyo y/of colaboracion.
