Prome Minister Eman a realisa un bishita oficial na Polis Maritimo pa expresa su reconocemento pa e manera eficiente cu nan a responde na e peticion di gobierno. Den coordinacion cu Strandpolitie, Cruz Cora y Aruba Tourism Security Patrol, a intensifica nan presencia y vigilancia for di riba lama, sigurando un proteccion adicional den e periodo di campamento.
Durante e bishita, a bira cla cu e edificio actual di Polis Maritimo ta den estado di deterioro total. Schimmel y falta di mantencion a pone cu a muda e personal pa Barcadera, mientras cu nan boto ta staciona na waf di APA, locual ta crea un situacion ineficiente. A pesar di tur esaki, e compromiso y dedicacion di Polis Maritimo ta notabel y di aplaudi.
Strand Politie y Aruba Tourism Security Patrol tambe a demostra nan determinacion den mantene nos beachnan y area turistico sigur. Mientras comunidad ta descansa den fin di siman y riba dianan liber, Strand Politie ta vigila nos costanan y Aruba Tourism Security Patrol ta mantene siguridad na e areanan frecuenta pa nos bishitantenan. Prome Minister a gradici Raquel Ras, District Chef Noord, pa e compromiso incondicional cu Strand Politie tin pa percura pa siguridad y mantene ordo publico den e area hotelero. Ademas Prome Minister a aplaudi e trabao di Aruba Tourism Security Patrol y Aruba Tourism Authority y AHATA pa facilita esaki.
Prome Minister a culmina su bishita na Baby Beach, unda mas cu 1800 hende ta campando. Cu un evento musical grandi planea pa diadomingo, e necesidad pa reforsa e presencia policial ta esencial. Gobierno ta pone prioridad riba siguridad colectivo, un esfuerso conhunto entre KPA, Rode Kruis, TSP, ATA, AHATA y nos pueblo mes.
Durante su bishita, Prome Minister a gradici Inspector Susy Nadal pa su liderato y determinacion, y a reconoce e esfuerso di Rum Reef Restaurant pa facilita un area pa crea un oficina temporal pa Polis durante e siman di campamento.
Cuerpo Policial ta trahando hunto cu comunidad, patruyando e areanan manera Santo Largo, Zwart Mangel, Rincon, Grapefield, Santana di Cacho, Baby Beach y Rodgers Beach. Cu comunicacion continuo cu campadonan y bon maneho, ta confia cu e siman lo pasa den harmonia y trankil. Inspector Nadal ta haci un apelacion na esnan campando of bishitanto beach, pa limita e consumo di alcohol pa evita incidentenan lamentabel.
Tabata apenas dialuna ultimo Prome Minister mr. Mike Eman, hunto cu Minister di Turismo mr. Wendrick Cicilia, a convoca un reunion urgente cu e stakeholdernan relevante, cu e meta pa desaroya un plan di maneho efectivo pa e siman druk di Semana Santa. E reunion aki tabata esencial pa garantisa ordo publico, siguridad y bienestar di tur ciudadano y bishitante di nos isla.
