Den preparacion pa e fin di siman largo y e dianan di campamento, Prome Minister Mike Eman a reuni cu diferente partner pa coordina accionnan enfoca riba siguridad, limpiesa y bienestar di comunidad durante e temporada di Pasco Grandi.
Durante su declaracion, Prome Minister a enfatisa cu e esfuerso aki ta resultado di colaboracion estrecho cu entre otro Cruz Cora, Cuerpo Policial, Wardacosta, ATA y otro partnernan, tur cu un rol importante pa garantisa un ambiente sigur y ordena.
Enfoke riba limpiesa y organisacion
Pa mantene beachnan y area di campamento limpi, a distribui saconan di sushi y a coloca bakinan na punto strategico manera: Seroe Colorado, Baby Beach, Eagle Beach, Arashi, Bushiri, Rogers Beach y Santo Largo.
E recogemento di sushi lo sigui un programa regular pa evita acumulacion y situacionnan no saludabel durante e dianan di campamento.
Presencia activo y vigilancia amplio
Den e ambito di siguridad, a fortalece presencia na tur costa:
- Cruz Cora cu post fiho na Seroe Colorado y patri sur
- Polis cu presencia continuo den tur area di campamento
- Wardacosta cu vigilancia riba lama y area natural
- Patruya adicional na costa norte, unda tambe tin actividad intenso
Ademas, lo tin:
- Polis maritimo activo riba awa
- Drones pa monitoreo di area
- Patruya constante entre diferente beachnan
Atencion special pa trafico
Gobierno a pidi Cuerpo Policial pa duna atencion special na trafico, despues di varios incidente reciente. Den coordinacion cu sector di transporte y turismo, lo tin control y comunicacion intensivo pa preveni accidente y mantene fluho sigur.
Facilidadnan pa comunidad y bishitantenan
Den colaboracion cu ATA, a instala facilidadnan manera baño na Eagle Beach y Baby Beach, y a fortalece comunicacion cu bishitantenan pa promove respet y bon convivencia cu comunidad local.
Mensahe di responsabilidad y comunidad
Prome Minister Eman a haci un yamada na comunidad pa disfruta e temporada den un forma responsable: “Nos kier un campamento sigur, plasentero y sin incidente, unda cada un cuida otro y cuida nos isla.”
Eman a subraya tambe e importancia di reflexion durante e periodo di Pasco Grandi, como un momento pa famia, comunidad y responsabilidad comparti.
Numbernan di emergencia
Gobierno ta insiste riba importancia di reaccion rapido den caso di emergencia:
- Emergencia general: 911
- Polis: 100
- Wardacosta: 913
- Cruz Cora: 563-2040
Specialmente pa situacion riba lama, a enfatisa pa contacta Wardacosta (913) inmediatamente, ya cu reaccion rapido ta clave pa rescate efectivo.
