Den cuadro di e “Programa di Gobernacion AVP–FUTURO 2025–2028”, cu tin como un di su prioridad stimula activamente e renobacion di San Nicolas y Oranjestad cu inversion y oportunidad pa tur hende, Minister di Finansa, Asunto Economico y Sector Primario mr. Geoffrey Wever hunto cu minister di Infrastructura, drs. Rene Herdé a haci un bishita conhunto na centro di Oranjestad.
Durante e bishita, Minister Wever y Minister Herdé a reuni cu Elton Arends di 360 Innovation y Harry Koeman di Oranjestad Investment Group, pa haña un bista amplio di e diferente proyectonan y inversionnan cu ta wordo desaroya den e centro urbano.
E obhetivo principal tabata pa duna e ministernan un vision integral di e proceso di revitalisacion urbano, tanto na nivel di infrastructura como na nivel di actividad economico y social.
Minister Wever a splica cu di banda di gobierno tin hopi proyectonan cu actualmenta ta canando, y tin hopi mas den pipeline. “Nos ta compromete pa revitalisa nos ciudadnan, duna nan un cara nobo, stimula actividad economico y crea oportunidad pa tur hende. E proceso di renobacion di edificio y cayanan ta un pida esencial pa eleva nos coiudadnan na un nivel mas halto di desaroyo,” segun e minister.
E encuentro a confirma un mensahe importante: Gobierno di Aruba ta determina pa desaroya Oranjestad y San Nicolas, como centronan di actividad, bida urbano y oportunidad pa inversion.
“Revitalisa nos ciudadnan no ta solamente un cuestion di infrastructura, sino un inversion den nos identidad, nos futuro y e bienestar di tur ciudadano di Aruba,” Minister Wever a conclui.
