Diamars 3 di juni, Prome Minister mr. Mike Eman, hunto cu sra. Tisa LaSorte y Minister di Turismo mr. Wendrick Cicilia, a inicia cu un serie di encuentro cu e CEO-nan di hotelnan estableci na Aruba, den cuadro di e preparacion pa un Dialogo Social cu e sector hotelero cu ta planea pa fin di e luna aki.
E temanan discuti ta refleha e necesidad urgente pa yega na solucionnan duradero pa e crecemento sostenibel di nos industria di turismo. E problema di maneho di awa di riool na AWSS, e falta di trahadonan den e sector di hospitalidad, y e scarsedad aumentando di vivienda ta solamente algun di e temanan cu mester trata cu urgencia. Ademas a trece den e combersacion e situacion laboral den turismo den cual tin e necesidad pa crea mas oportunidad pa desaroyo y crecemento profesional pa nos hendenan den e sector.
Un punto crucial ta e acceso pa nos beachnan publico y e lucha pa conserva nos identidad y autenticidad mey mey di tur e desaroyo turistico. Aruba su producto principal ta hustamente e autenticidad di nos comunidad, e hospitalidad natural di nos hendenan, y e compromiso sincero pa trata nos bishitantenan cu un bonbini caluroso. Esaki mes ta e forsa cu ta atrae turistanan pa bolbe, biaha tras di biaha.
Prome Minister a expresa su sincero gratitud na sra. Tisa LaSorte pa a carga y organisa e encuentronan importante aki, y tambe a gradici e Gabinete di Gobernador pa pone na disposicion e Cas Ceremonial pa por tene e sessionnan aki. Esaki ta un momento di reflexiona riba con nos kier sigui desaroya nos industria turistico, den harmonia cu e bienestar di nos pueblo.
