obierno di Aruba y seis tour operators a firma un protocolo di colaboracion pa fortalece e dialogo riba e maneho di actividadnan turistico den nos area natural. E acuerdo a sigui e decision reciente di hues, cu habri caminda pa continua e consulta entre Gobierno, e operadornan di tour riba UTV’s y ATV’s y otro stakeholder.
Prome Minister mr. Mike Eman a expresa satisfaccion cu e decision, indicando cu esaki ta ofrece un oportunidad pa sigui traha riba un balansa entre proteccion di naturalesa y e continuidad di e actividadnan turistico. Segun e Prome Minister, e meta ta conserva e patrimonio natural di Aruba mientras cu ta garantisa cu turismo sigui aporta na e desaroyo economico di pais. El a invita tambe otro tour operators pa uni nan na e proceso di dialogo.
Minister di Turismo, Transporte y Labor, mr. Wendrick Cicilia, a destaca cu e sector di tour operators y tour guides ta un parti integral di e experiencia turistico cu Aruba ta ofrece. El a enfatisa cu e mesun sector ta reconoce e importancia di proteha nos recursonan natural y cu, a traves di consulta y cooperacion, ta posible logra solucionnan sostenibel cu ta beneficia tanto naturaleza como economia.
Minister di Vivienda, Infrastructura, Servicio Interno y Telecomunicacion drs. Rene Herdé a agradici e operadornan di UTV’s/ATV’s cu a firma e protocolo, reconociendo e esfuerso cu nan a haci durante hopi aña pa logra un espacio di dialogo. Segun Herde, e firma di e protocolo ta confirma e compromiso comparti pa sigui dialoga y traha hunto te ora yega na un solucion duradero. El a enfatisa cu Gobierno lo sigui sinta na mesa cu e sector pa sigui construi un futuro cu ta balansa e interesnan di naturalesa, turismo y desaroyo economico.
Cu e firma di e protocolo, Gobierno y e UTV’s/ATV’s tour operators a reafirma nan compromiso pa continua e dialogo y desaroya e medidanan cu fortalece tanto e conservacion di nos patrimonio natural como un sector turistico sostenibel pa Aruba.
