ORANJESTAD – Mientras cu comunidad di Aruba ta den pleno ambiente di fiesta pa Siman Santo y pasco di resureccion, un realidad economico ta sperando e siman aki. Datos ta indica un subida historico cu lo drenta na vigor e diaranson aki, dia 8 di april.
Aruba ta “di fiesta”, cu beachnan yen y famianan disfrutando di campamento y e dianan liber, sin sa cu e cuenta pa e fiesta aki lo wordo presenta pronto. E aumento den e index pa e luna di maart, lo dal e consumidor su cartera e siman aki.
SUBIDA DI MAS CU 45 CENT
E calculonan ta indica cu e aumento no lo ta uno chikito. Pa e diaranson aki, 8 di april, ta proyecta cu e prijs di gasolin por subi cu mas o menos 45 cent pa liter, mientras cu diesel por mira un aumento di mas cu 50 cent. Esaki ta nifica cu e prijs di diesel lo por surpasa e bariera di 250 cent pa liter pa prome biaha den basta tempo.
GOLPI DESPUES DI FIESTA
Pa hopi hende cu a gasta nan presupuesto den e dianan di fiesta, e noticia aki ta bin como un hacha riba cabes.
Transporte y Logistica: E costo pa move mercancia den container pa Aruba lo subi mesora debí na e “Fuel Surcharge”, locual por pone presion riba e prijsnan di cuminda den supermarket.
Consumidor: E ciudadano cu mester yena su tanki pa bay traha despues di e dianan liber lo sinti e diferencia mesora na e pompnan.
CONSEHO: YENA TANKI PROME CU DIARANSON
Pa esnan cu kier scapa un poco di e aumento fuerte aki, e miho conseho ta pa yena bo tanki di auto prome cu e diaranson aki, 8 di april. Unabes cu e orario di marduga bati, e prijsnan nobo lo drenta na vigor y e costo di bida na Aruba lo bira significativamente mas caro.
Mientras nos ta termina di celebra nos tradicionnan di Siman Santa, ban prepara nos mes emocionalmente y financieramente pa e realidad cu ta bin e siman aki.
