Minister Plenipotenciario di Sint Maarten, Gracita Arrindell, a enfatisa e importancia di union y cooperacion entre e islanan pa enfrenta reto comparti, durante e 21 edicion di Overseas Countries and Territories – European Union Forum.
Durante su participacion na Conferencia Ministerial, Arrindell a expresa su aprecio pa Gobierno di Aruba pa e organisacion di e encuentro internacional. “Nos ta hopi gradeci pa e caluroso bonbini y hospitalidad cu nos a ricibi na Aruba”
Segun e Minister, e foro a mustra claramente cu, apesar di diferencianan entre teritorio, e islanan ta enfrenta desafionan similar. “Tur di nos ta comparti e mesun reto nan, manera cambio climatico, conectividad y conciencia riba biodiversidad,” el a indica.
E a subraya cu e balor principal di e conferencia ta den e posibilidad pa yega na conclusionnan conhunto y fortalece cooperacion entre partnernan. “Ta importante cu nos no solamente papia, pero cu nos yega na resolucionnan conhunto cu lo guia nos pa dilanti,” segun Arrindell.
Ademas, el a destaca e importancia di intercambio di conocemento entre islanan, señalando cu cada teritorio tin su propio experiencia cu por contribui na solucionnan comun. “Nos mester sigui comunica y comparti best practices pa fortalece nos capacidad como islanan,” el a añadi.
Den su comentario riba expectativa di e foro, Arrindell a enfatisa cu e resultado final mester tin impacto real pa e comunidadnan. “E declaracion final mester tin significado y traduci den accion concreto pa beneficio di nos ciudadanonan,” el a declara.
E participacion di Sint Maarten den e foro ta confirma e compromiso di e isla pa cooperacion regional y internacional, cu enfoke riba responsabilidad, transparencia y bienestar di su pueblo.
Tocante OCTA/OCT-EU Forum
The 21st Overseas Countries and Territories – European Union Forum
Na april 2026 Aruba lo ta anfitrion di e di 21 edicion di Overseas Countries and Territories – European Union Forum, un plataforma internacional pa dialogo entre Union Europeo y su Paisnan y Teritorionan Ultramar (LGO).
E foro ta reuni formuladornan di maneho, diplomaticonan y representantenan di sector publico y priva pa discuti temanan strategico manera cooperacion sostenibel, cambio climatico y transformacion digital.
Como Pais y Teritorio Ultramar, Aruba tin un rol unico como brug entre Europa y region Caribe. E foro ta brinda un oportunidad pa fortalece cooperacion y intercambio entre partnernan internacional.
