Colegio Muchila Creativo a organisa recientemente, dia 04 di Juli, graduacion di 3 studiantenan na Violet Center. Colegio Muchila Creativo ta un scol secundario pa studiantenan neuro diverso entre 15 pa 29 aña.
![](https://solodipueblo.com/wp-content/uploads/2024/07/muchila-8-1024x768.jpg)
Un gran cantidad di persona: mayornan, familiares, conocirnan, invitadonan y docentenan a bin hunto pa celebra e graduacion 2024 di e studiantenan di Colegio Muchila Creativo. Tur studiante a recibi durante e anochi nan rapport. Na comienso di e anochi cabesante Rose-Marie Provence a duna un splicacion ken Muchila Creativo ta y cua proyectonan e Fudacion a ehecuta durante nan 21 aña di existencia. Despues di e apertura a sigui cu e parti oficial na unda Johanny Ballestero Zapata, Chloe Cicilia y Benjamin Wever a recibi nan certificado y un certificado di Arte.
![](https://solodipueblo.com/wp-content/uploads/2024/07/muchila-7-1024x768.jpg)
Despues di e parti oficial di graduacion a continua cu e entrega di e rapportnan di cada aña pa cada studiante. Colegio Muchila Creativo ta consisti di 3 aña. Banda di e estudio di 3 aña tin un “speciaal traject” y un “Leerwerk Traject”, pa prepara esnan cu a finalisa cu nan estudio pa trabou den comunidad. Den e sala di exposicion di Violet Center publico presente por a observa un bunita exposicion di tur e pinturanan cu e studiantenan a traha bou guia di nan docente Rudberth Wolff.
![](https://solodipueblo.com/wp-content/uploads/2024/07/muchila-6-1024x768.jpg)
Siguientemente despues di e parti oficial, tur studiante a presenta e Musical “Transformacion”na publico presente. Autor y director di e mini Musical ta Emerita Emerencia, compositor musical Jane Lanooij, Pearl Dumfries directora musical y coreografo Sabrina Salas. Door cu e teatro tawata ful yen, mester a presenta e musical dos biaha tras di otro den e teatro di Violet Center for the Arts.
![](https://solodipueblo.com/wp-content/uploads/2024/07/muchila-5-1024x768.jpg)
Nan final tur esnan presente por a saboria di un dushi dinner. Mayornan, famia y publico presente tawata hopi satisfecho di e anochi exitoso.
![](https://solodipueblo.com/wp-content/uploads/2024/07/muchila-4-1024x768.jpg)
Muchila Creativo kier gradici nos sponsers Superfood Care Program y Cede Aruba pa nan colaboracion.
![](https://solodipueblo.com/wp-content/uploads/2024/07/muchila-3-1024x768.jpg)
Ademas Muchila Creativo ta gradici Taste My Aruba, The Old Cunucu House, y Elite Productions pa nan cooperacion na nos evento di graduacion. Muchila Creativo kier gradici tambe tur docentenan, DJ Mike Petronia y tur esnan cu a coopera na e exito di e anochi. Masha danki di curason!
![](https://solodipueblo.com/wp-content/uploads/2024/07/muchila-1-1024x768.jpg)