Sorteo lo ta dia 2 di juli 2023 pa 6’or di atardi via pagina di Facebook di Partido MEP
Un biaha mas Partido MEP ta gradici tur sostenedo y tur esnan cu a cumpra rifa di nos partido pa asina duna oportunidad na 5 feliz ganado goza mas di nan vakantie den e período aki unda nos mucha nan, despues di un aña di studia duro, tin vakantie di scol. E rifa a sold out un biaha mas.
Partido MEP, pa celebra 52 aña di existencia e aña aki, y pa sigui den e lucha hunto cu pueblo di Aruba, un biaha mas a pidi e sosten na cada sostenedo y pueblo di Aruba en general. Den un tempo basta cortico, Partido MEP a bende tur buki di rifa. E sorteo lo ta dia 2 di juli 2023. Lo tin 5 premio cash. 1. AWG. 10.000,-. 2. AWG. 1.500,-. 3. AWG. 750,-. AWG. 500,-. AWG. 250.
“Un biaha mas nos a bati na bo porta y a pidi bo sosten. Cosnan no ta facil pa hopi ciudadano y nos sa esey. Y nos ta aprecia cada ayudo y e sosten enormemente. E compromiso di MEP pa e pueblo di Aruba ta pa sigui traha incansablemente pa logra alcansa e maximo felicidad pa cada ciudadano cu ta biba riba nos baranca tan stima. Y sosten di nos pueblo ta e motor den logra esaki. Danki pa e sosten. Danki pa semper tey pa MEP”, Lider di MEP Evelyn Wever-Croes a expresa.
Lider di MEP, den nomber di Partido MEP, ta invita un y tur pa wak e sorteo Live riba Pagina di Facebook di MEP, diadomingo awo, 2 di juli pa 6’or di atardi. Exito na tur cu a pone nan linea na awa.
