Situacion confuso ta sigui na Mundo. Prome motibo ta e cambio di poder global. Merca cu Nato ya no ta e unico poder na Mundo. Tambe gran parti ta pa motibo di Trump su bay y bin. E no sa kico e por logra, toch e ta pusha su ideanan. E ta keda cu su MAGA y America First, pero tur lidernan politico serio di paisnan na mundo ta ariba mesun liña pa nan pais. Eynan Trump a pega, pio si nos analisa e posicionnan malo di Merca e ultimo 100 añanan, cual posicionnan a crea dolor, pobresa y humiliacion di pueblonan na mundo.
Ta bon pa wak e situacionnan di conflicto na mundo, loke mi ta yama “The big Picture”.
- Na Ucraina, Rusia ta ganando e guera contra Ucraina/Nato/Merca, pero Ucraina fuerte y awor cu su accionnan terorista, apoya pa UE (Union Europeo) y Inglatera;
- Na Israel, e guera di Israel contra Hamas a bira un genocidio di Israel contra Palestinonan y Israel apoya grandemente pa paisnan di Nato, specialmente Merca/Trump;
- E Intencion di Israel pa bombardea e proyectonan nuclear di Iran, cu e apoyo di Merca, informacionnan di inteligencia Mericano ta bisa Trump pa no sigui Israel;
- E guera di Merca contra China, cu Merca no sa ainda cual posicion e tin di tuma;
- E guera na Africa di Merca/Francia contra e lidernan nobo di paisnan cu ideanan progresista y cual ideanan ta ricibi hopi apoyo na Africa y na mundo;
- E guera di Merca contra Venezuela pa nan bira doño di e Petroli Venezolano.
E Big Picture ta mustra cu nos ta bibando un era hopi peligroso.
Prome punto di atencion ta e hecho cu ora analisa e posicionnan ta bisto cu tras di cada enemigo di Merca/Trump, nos ta wak e presencia di Rusia y China pa yuda e paisnan aki sobrevivi militarmente y progresa. Esaki no ta di awor cu Trump a bira presidente, pero for di basta aña caba. E paisnan enolvi no tin nada di sconde, igualmente Rusia y China. Esaki ta haci e situacion peligroso ya cu Merca, China y sigur Rusia tin armanan nuclear. Rusia cu e arsenal Nuclear mas grandi y cu su armanan y misilnan sofestica cu Merca no ta pose’e. Loke ta hopi tenso ta e situacion na Ucraina, na Palestina y na Iran cualnan por bay for di man. Nos por bisa tambe cu e mundo Unipolar cu Merca/NATO, como e unico poder global mas grandi, for di 1991, ya na 2022 a cambia y awe nos ta biba den un mundo multipolar.
Awe e podernan grandi den e mundo multipolar ta China, Merca y Rusia. Nos sa tambe cu Rusia y China tin acuerdonan Bi-Lateral y den cada conflicto di e big Pictura nan ta uni.
Un aspecto pa menciona ta e conducta erratico di Trump
Di dos punto di atencion ta e conducto erratico di Trump, cu posicionnan cualnan no ta fijo y bo no por confia, aserca su actitud agresivo, tin biaha grosero, no diplomatico, hendenan ront di dje ta bisa cu e no ta lesa documentonan oficial. Semper e ta sali cu un posicion extremo y menasante, despues di scucha su expertonan, hopi biaha e ta dobla y accepta, pesey e tin e Nickname, TACO (Trump Always Chicken Out). Tambe otronan ta bisa, no duna balor na loke Trump ta bisa, pero wak e accionnan di Merca. Analisando e conflictonan di e Big Picture, Nos ta wak cu gobierno Trump, su expertonan pa atende e problemanan Internacional, varios biaha tin dos corriente contrali na otro, di su expertonan kendenan ta atende un conflicto. Sabiendo esaki por comprende Gobierno Trump mihor, pasobra e politica internacional di Trump ta confuso y ta cambia constantemente .
Prome nos tin Marco Rubio como ministro di Asuntonan Exterior. Semper e tabata un senador ultra-derechista, contra tur gobierno progresista. Rubio no sa kico ta diplomacia y no por analisa posicionan normal.
Richard Grenell, representante di e gobierno Trump pa misionnan special y tambe for di partido Conservador, e vocero di e gruponan Petrolero na Merca.
Michael Thomas Flynn ta un militar retira y tabata National Security Advisor di Trump for di su inauguracion te meimei di februari, un amigo 100% di Israel, pero a ser retira pa motibo di bisa cosnan cu no ta berdad.
Joseph K. Kellogg, Un ex-general, ultra-derechista, e funcionario apunta dor di Trump pa atende e conflicto Merca/Ucraina vs Rusia, pero ya despues di 2 luna a ser hala un banda for di e conflicto na Ucraina, igual na Marco Rubio. E negociador cu Rusia a bira Witkoff.
Steven Charles Witkoff ta un Real Estate Investor igual na Trump y a tuma e posicion di Flynn como su representante pa e conflicto na Palestina y na Iran entrante Februari 2025. Witkoff no ta un diplomatico, pero sa y ta comprende e posicionnan internacional mihor cu Rubio mes. Pesey e ta e funcionario cu Trump tin mas confiansa y kende awor ta envolvi den e conflictonan Rusia vs Ucraina, Israel/Merca vs Hamas, Israel/Merca vs Iran y China vs Merca. Marco Rubio mes ta benta un banda. Witkoff ta e persona di Trump den e negociacionnan ariba conflictonan internacional.
Pasando ariba e conflictonan di e Big Picture nos ta wak kico ta sosodiendo.
Guera di Ucraina, nos ta mira Nato/Merca vs Rusia.
Porfin, despues di e acuerdo Rusia-Ucraina na Istambul, Turkia na 2022, cual acuerdo ariba insistencia di Merca y Inglatera a ser rechasa despues pa Ucraina, Rusia cu Ucraina ta na mesa pa negocia, iniciando 2 juni 2025. Negociamento no ta bay manera mester ta. Rusia a entrega su proposicion y e ta mantene su posicionnan for di 2021, cual a ser entrega na Merca y na Nato na december 2021. E puntonan principal ta pa Ucraina reconoce e regionnan cu Rusia ta dominando, manera Lugansk, Donets, Zaporozhye y Kherson.
Prome cu e negociacionnan Paisnan di UE (union Europeo) y Inglatera a purba di stroba cu un posicion pa partidonan bay di acuerdo cu un tregua di 30 dia.
E grupo di negociadornan di Trump, Rubio y Kellog tambe a bay di di acuerdo cu e postura di Europeanonan. Rusia no kier papia mes ariba e idea aki. Trump a hala Rubio y Kellog un banda, despues Trump a manda Witkoff papia cu Putin, tur cos a aclaria y Trump/Witkoff a ordena Zelensky pa bay negocia, cual a tuma lugar 2 juni.
Trump ta bel Putin 4 juni 2025
Den e situacion actual cu Ucraina perdiendo e guera, Ucraina a inicia cu su accionnan di terorrismo, atacando blanconan civil na Rusia y cual ta ricibi tur apoyo di UE y di Inglatera. E atakenan aki por resulta peligroso si algo bay malo y envolvimento di Nato sali na cla.
E atake ariba e avionnan strategico di Rusia, 2 juni 2025, despues cu negociacionnan a termina, a crea problema grandi pa Merca ya cu Merca y Rusia tin un acuerdo cu e avionnan strategico di Rusia y Merca ta den aire liber pa e satelitenan di Merca controla e avionnan Ruso y e satelitenan Ruso por controla e avionnan Mericano. Merca, CIA tin tur informacion di e avionnan strategico Ruso, Rusia no ta confia CIA y ni Merca.
Esaki a haci cu diaranson Trump a bel Putin y bisele cu Trump/Merca no tabata sa di e atake adelanta. Ucraina y Europa ta papia di 41 avion destrui, mientras Rusia a mustra videonan cu 3 avion cu daño, pero tur 3 por wordo drecha, segun e vocero di Rusia.
Rusia su trupanan ta avansando y ta ser bisa cu e ehercito di Ucraina ta serca di colapsa, pa falta di militarnan, falta di armanan sofestica y falta di hopi pa por hiba un guera cu resultadonan positivo. E contesta di Rusia ariba e atakenan di 2 juni ultimo a trece un reaccion barbaro ariba Ucraina, cual a causa dañonan grandi. Ban wak si ta bini un acuerdo o e ehercito di Ucraina ta colapsa, cu e consecuencia di un pas logra ariba campo di bataya.
UE y GB (Gran Bretaña) no kier pas, nan ta apoya accionnan di Ucraina.
E paisnan di EU y GB ta haci lo maximo pa no bini pas na Ucraina.
Europa Occidente cu su tremendo infra-structura y leynan social, toch awe nan ta den un proceso di deteryoro. Esaki debi na su lidernan debil, mal prepara, kendenan kier mantene posturanan anticua. Europa parce di ta perdi cu su posicionnan robes den e mundo cambiante awendia. Un politico izkierda a bisa cu UE y GB ta kere cu nan ta excepcional:
UE y GB a pasa den un periodo di prosperidad y seguridad.
UE y GB cu su 550 miyon di habitante ta pidi proteccion di Merca cu su 350 miyon habitante pa defende nan contra un Rusia cu 150 miyon habitante. E cifranan ta indica cu Europa ta hopi malpara. Cu e guera na Ucraina, e gas natural barata for di Rusia no ta yega, cual ta haciendo daño na nan economia/prosperidad. Trump/Merca cu e posicion pa no sigui defende UE y GB si nan no paga pa e seguridad aki. Pues prosperidad y seguridad a termina. Europa ta sigui confuso. UE y GB no kier tende nada cu Rusia ta avansando y ta bay gana e guera. Con un Rusia, cu segun nan ta un pais atrasa por gana e guera contra nan=Nato? Pues UE y GB ta sigui kere den derota di Rusia y nan ta duna tur apoya na Ucraina.
UE y GB tin plannan grandi pa construi un compleho militar pa produci arma, alegando nan mes for di Merca. Pa e compleho militar cuminsa duna su fruta, ta dura como 10 aña y paisnan di Europa mester destina 5% di na GDP na militarismo. Dor di presion di Merca, mayoria di armanan di guera for di 1945, ta ser produci na Merca. Por bisa e unico industria lucrativo cu Merca ta pose’e, despues di e industria di auto. E postura di UE y GB ta un capitulo ariba su mes.
Guera Hamas contra Israel/Merca
E guera por bisa cu a cuminsa for di a 1948, ora UNO a dicidi cu ta bini e estado di Israel y e estado Palestina. Israel constantemente a keda horta teritorio di Palestina. Na oktober 2023 a cuminsa un etapa nobo cu Hamas atacando soldanan Israeli y tambe un Kibbuts Israeli causando hopi morto, parti tambe dor di atake di trupanan Israeli. Hopi comentarista ta bisa cu e atake di Hamas di 7 okt 2023 tabata pa stroba e Abraham Accords relaciona cu Saudi Arabia pa reconoce Israel y lubida e estado Palestino.
E reaccion di Israel ta devastador, pa nan, tur Palestino na Gaza ta un miembro di Hamas y nan a cuminsa bombardea Gaza sin fin, matando mas di 55 mil Palestino. E bombardeo aki ariba casnan di Palestinonan, schoolnan, universidadnan, Hospitalnan y otro sitionan pa duna atencion medico na poblacion, pa hendenan cu bon pensamento, loke Israel ta haci, ta ser categorisa como genocidio. Tin condenanan di Corte internacional di Husticia, pero Israel cu ayudo di Merca ta rechasando esakinan. A bini varios tregua y awor Hamas, Merca y Israel ta den negociamento pa otro tregua y pa termina e entrega di rehennan tanto dor di Hamas (+ 55) como dor di Israel. Israel tin como 10 mil Palestino deteni for di Gaza y West-bank, sin cu nan a presenta dilanti un Juez/Tribunal. Pues nan tambe ta cay bao di e categoria di rehen.
Mientrastanto Israel ta sigui cu su matamento di Gazanonan sin misericordia, Tambe na otro parti di Palestina, West-Bank Israel ta sigui cu su hortamento di tera di Palestinonan y gobierno ta duna e settlernan pa nan traha nan cas y nan finca. E asesinatonan ta cruel, awor na Gaza tin gangnan arma di Hudiunan cu ta mata Palestinonan kendenn ta bay busca
cuminda. Tambe Hudiunan ta mata hopi di esnan cu ta duna ayudo humanitario na Palestinonan.
Trump cu regalonan Biyonario.
Ultimo tempo tin varios acontecimentonan den mundo Arabe. Trump a bishita e paisnan Arabe mas rico, meimei di mei 2025, sin pasa na Israel. Na e paisnan aki Trump a ser ricibi ariba tapijt cora, esta un tremendo bonbini. Ademas Trump a ricibi regalonan di inversionnan biyonario pa companianan di su familia y tambe pa cierto industrianan/comerciantenan Mericano. Trump a keda contento y cada biaha ta papia di e reglonan aki. E mes a ricibi un avion Boeing 747, cual ta costa banda di 400 miyon dollar di Gatar.
No tin informacion si e regalonan di mundo Arabe tin di haci cu reconocimento di e Estado Palestino, cual cada biaha lidernan Arabe tin nan boca yen di e reconocimento aki.
Siman pasa dialuna 2 juni, na Amman, Jordania, mundo Arabe a bolbe reuni ariba e situacion alarmante na Gaza.
Eynan desicion a cay:
- Cu ningun Pais Arabe ta bay tuma e 2,3 miyon Gazanonan;.
- Tambe pa Israel cambia su actitud radicalmente relaciona cu e boycot di cuminda medicina, awa y otro:
- Tambe pa un Tregua y reconocidmento di Palestina como un estado Independiente;
- Un delegacion di ministronan di e paisnan Arabe lo bay bishita West-Bank na Palestina pa papia cu lidernan Palestno y nan mes wak kico ta pasando;
Israel a nenga di ricibi nan cual a bira un insulta grandi pa e paisnan Arabe, specialmente Saudi Arabia. Mohamed Bin Salman e prins Heredero di Saudi Arabia den un declaracion directamente contra Israel y Merca a bisa pa nan stop cu e matamento sin fin di Palestinonan na Gaza, pa nan percura pa cuminda y tur necesidadnan cu e ser humano mester diariamente pa drenta Gaza y Reconoce Palestina como un estado independiente.
Voto den conseho di seguridad di UNO, diahubs 5 juni 2025, Merca para su so.
5 Juni 2025, den Conseho di Seguridad di Nacionnan Uni un resolucion a wordo treci pa yega na un tregua, tur rehen mester wordo libera, Israel ta stop cu matamento y bandona Gaza. 14 Pais di e total di 15 a vota pro, pues 3 pais, Alemania, Francia y Inglatera cualnan ta miembro di Nato. Merca a uza su veto y tranca tur cos. Un desicion mahos y baho di Trump/Merca. Na Gaza mes e bombardeonan ta sigui, mas Palestino ta muri y awor Israel ta uza e boycot di cuminda, awa, medicina y necesidadnan pa e Palestinonan, como arma di guera. Lidernan Israeli ta papia abiertamente cu nan kier elimina tur Palestino for di Gaza.
Israel for di control, pero Accionnan ta den man di mundo Arabe y mundo Muslim.
Pues Israel a bira un pais for di control, ora ta toca aspectonan humano. Lidernan poitico ta papia abiertamente con pa caba cu e palestinonan na Gaza. Mas baho ta cu parti grandi di Hudiunan na Israel ta apoya e ponencianan aki pa caba cu Palestinonan. Pues e aspectonan humano ta perdi serca lidernan politico y serca e pueblo di Israel. Israel ta for di control.Na UE, Lidernan politico ta sigui cu nan apoyo politico, economico , financiero y militar na Israel pa e pais aki sigui asesina Palestinonan, pero den conseho di Seguridad 3 pais di Europa ta vota contra Israel. Na Merca e situacion ta otro. Ehempelnan cla ta loke Trump y otro lidernan Mericano ta bisa ariba e asunto aki. For di prensa nos sa di e posicion di e lider di e partido politico mas grandi na Hulanda, Wilders kende a bisa cu e ta apoyo Israel 100%, e a bay bebe koffie cu Netanyahu y bisando cu no tin genocidio cometi na Gaza.
Tin siñalnan positivo for di Europa, tin manifestacionnan grandi di e poblacionnan pro Palestina y contra Israel, specialmente contra e genocidio cu ta wordo cometi contra Palestinonan. E hecho cu 3 pais di Europa den conseho di seguridad a vota contra Israel tin Israel mas Isola ainda. Claramente na mundo ta Merca so ta apoya Israel cu su genocidio.
Accionnan awor ta den man di lidernan Arabe y otro lidernan Muslim na mundo kendenan cu boca grand ta bisa cu nan ta contra e genocidio ariba Palestinonan y nan ta na fabor pa mundo completo incluyendo Merca y UE reconoce e Estado Palestino, tambe cu nan ta dispuesto pa lucha pa esaki. Awor ta e momento pa mustra nan solidaridad cu Palestina. Ban wak si e regalonan na Trump tin e prijs: Reconocimento di Estado Palestino.
E intencion di Israel pa bombardea e laboratorionan Nuclear di Iran
Israel pa hopi añanan caba ta bisa cu nan kier bombardea e sitionan di e industria nuclear di Iran. Apesar cu nan a mata mas di 55 mil Palestino, segun expertonan nan ta perdiendo e guera contra Hamas y otro organisacionnan militar cu Iran ta apoya. E hutinan constantemente ta bombardea Israel cu misilnan y Israel no tin defensa contra e misilnan aki, cual sigur ta ser entrega dor di Iran na e Hutinan.
Israel ta den un situacion dificil y nan kier un guera cu Iran, pero nan mes no tin e armanan pa por hiba e guera aki. Pa e motibo aki Israel ta busca Merca pa bringa e guera aki pa nan. Inteligencia Mericano a trece yen di consideracionnan na Trump pa tuma un desicion correcto. Segun Inteligencia Mericano, cu Iran na 2025 no ta e Iran di algun aña atras. Nan ta pose’e misilnan hypersonico y nan tin un bon defensa aereo cu hopi S-400, cumpra for di Rusia. Aserca Iran cu su conocimento tecnologico a adapta hopi di e S-400-nan na e nivel di S-500, cualnan ta mas sofestica cu e S-400-nan. Pues Iran tin bon defensa y pa nan atake nan tin misilnan di atake cu Merca no ta pose’e. Nan tin bon aliansa cu Rusia y China.
Lo sali algo for di e negociacion na Muscat, capital di Oman?
Merca no kier pa Iran traha su bom nuclear. Iran ta bisa cu pa motibo religioso, nan no ta construi un bom nuclear. Rusia y China tambe ta na fabor pa Iran keda sin construi e bom nuclear. Tur e consideracionnan prome menciona a cambia, awor e posicion TrumpMerca ta pa negocia cu Iran. E negociacionan ta duro, ya tabatin 5 rondo di negociacion, sin resultado. Iran a sabiendo cu su posicion ta fuerte militarmente, politicamente, e ta un potencia petrolero grandi, Iran tin acuerdo cu e paisnan Arabe, manera Saudi Arabia, Union di Emiratonan Arabe, Gatar, Irak y mas. Iran tambe tin un pakete fuerte pa negocia. Sigur loke ta e fin di sancionnan di Merca contra Iran. E elogio di Trump na Rusia, pa nan intervencion como amigo di Iran y di Merca pa e negociacionnan ta un punto positivo pa yega na un bon final. Esaki ta un muestra cu ta bay yega na un acuerdo. Un acuerdo cu sigur Israel no lo bay gusta. Pa Trump un desicion dificil, pasobra na Wahington ta e lobby Hudiu, AIPAC (American Israel Public Affairs Committee) cu su Dollarnan ta dicidi tur cos na fabor di Israel. Na April, Trump a menasa Iran cu si no yega na un acuerdo, Merca lo bombardea Iran. Rusia y China semper a apoya Iran y nan a bisa Merca cu e solucion di e conflicto ta un acuerdo uzando diplomacia, no menasa. Si bombardea e instalacionnan nuclear di Iran, esaki lo tin consecuencia pa mundo completo. Despues di e combersacion telefonico diamars 4 juni ‘25 di Trump cu Putin, Trump a scirbi ariba su “Truth Social Platform” cu Putin lo participa tambe den e deliberacionnan pa asina yega na conclusionnan rapido.
Portavos di Kremlin, Dmitry Peskov a confirma cu Putin a bisa Trump cu e relacion fuerte di Rusia cu Iran lo yuda contribui positivamente durante e negociacionnan.
Tin expertonan ta bisa cu e acuerdo di 2015, e JCPOA (Joint Comprehensive Plan of Action) e acuerdo di Iran cu UE y Merca y cual a ser rechasa dor di Trump na 2017, awor ta bira JCPOA II, ta bek ariba mesa. Otronan ta bisa cu e poder di Israel y AIPAC ta demasiado grandi y Trump no tabay accepta JCPOA II, pesey tin varios scenarionan cu por sali.
- Ta yega na acuerdo, sancionnan contra Iran ta for di Mesa. Israel malcontento;
- No tin acuerdo, pero Merca no ta bombardea y tur cos ta sigui manera e ta awe;
- No tin acuerdo, Merca cu Rusia ta yega na acuerdo cu Merca ta bombardea un sitio nuclear bieuw, insignificante na Iran. Iran ta bombardea dos base militar Mericano na Irak y na Saudi-Arabia o na otro pais Arabe y tambe 2 base militar na Israel.
Conclusion, Trump a mustra su poder pa bombardea, Iran tambe no ta rindi, nan tambe ta ataca. Situacion ta sigui manera e ta awe. Despues den poco tempo, Merca ta cuminsa los e sancionnan. Trump contento, Israel contento, igual Iran.
Venezuela cu un bon futuro, China y Merca interesa den e Petroli.
E eleccion di 25 mei ultimo a ser gana ampliamente dor di e partidonan cu ta apoya Presidente Maduro. No tin duda, Maduro tin amplio sosten di pueblo. Segun observadornan internacional Maduro, apesar di e situacion dificil na Venezuela, cu e mas di 960 sancion y boycot di Merca y UE y cu poco finansas, a hiba un bon administracion, atendiendo cu e problemanan di pueblo. Di dos ta cu Merca via USAID/CIA a stop di financia oposicion na Venezuela. Di e 285 puestonan den Asamblea Nacional (Parlamento), Maduro tin apoyo di 259. Un apoyo grandisimo.
Un analisis di e situacion petrolero actualmente na Merca y na mundo ta indica cu e situacion na Merca no ta di e bon ey. Mientras cu Trump/Merca a para e acuerdo di Venezuela cu e compania grandi di Merca Chevron. Merca mester di Petroli. Produccion di Shale=Esquistio na Merca ta fracasando, mayoria di posnan ta produci mas di 60% di awa y poco petroli. Prijs pa produci un bari petroli di hopi posnan di esquistio ta yegando $ 60 pa barril. Merca mester di petroli y di unda? Venezuela!!! Ora nos wak e prijsnan pa saca un barril di petroli for di suelo, na Venezuela e ta un promedio di $15 pa $17, Saudi Arabia algo Ariba $20 y na Merca cu tur e problemanan e ta entre 50$ y 60$.
Merca y China ta interesa den e Petroli, Venezuela cu trankilidad politico den futuro.
Expertonan considerando e situacion di Petroli na Mundo y specialmente na Merca unda e situacion petrolero na Merca den futuro sercano tin problema grandi, ta di opinion cu Trump ta bay hala Rubio un banda, e ta yama Maduro pa nan yega na Acuerdo ariba petroli di Venezuela. Trump semper ta cuminsa papia cu boca grandi y menasante, pero despues cu papia cu expertonan manera Grenel, ora e wak e realidad, e ta floha y baha cabes. TACO!Mientrastanto dos compania Petrolero grandi di China a firma acuerdo cu Venezuela pa explora posnan di Petroli na Orinoco, e crudo pisa y na Zulia e crudo lihe.
Awor ta sali na cla cu esnan cu ta dirigi CITGO, e compania Venezolano na Merca cu Trump na 2019 a expropia y a regala e gang di ladronnan ront di Guaido. Esnan cu ta dirigi Citgo awe, for di investigacionnan ta sali na cla cu 20 biyon di dollar a desparce y tin un investigacion hudicial na Merca pa castiga esnan responsabel pa e robo aki. Tambe ta conoci cu Marco Rubio, Canciyer di Merca a ricibi miyonnan di Dollar for di Citgo.
Cu e perdida di Chevron y na su lugar dos empresa petrolera grandi di China ta mustra cu e futuro pa loke ta benta di petroli ta segura. Segun expertonan otro aña Venezuela ta bay produci 2 miyon barril pa dia. Aserca e resultado di e eleccion ta duna Venezuela, bao Maduro, un trankilidad politico te 2030, Sigur mas despues tambe.
Pues Venezuela ta bay progresa.
