6.1. Campaña cu hopi promesa, cualnan ta dificil pa cumpli dor di nos debenan halto.
Campaña electoral ta yegando su fin. Otro campaña yen di promesanan cu politiconan ta bay haci, sin duna atencion na e problema mas grandi di Aruba, cual ta nos debenan nacional.
E politiconan cu yen di promesa, pero parce hendenan cu no sa di e debenan haltisimo, aserca hopi no sa kico ta biba bao di trahadornan na Aruba y con e situacion financiero di nos pais ta.
Si nan sa con halto nos debenan nacional ta, nan mes por a duna contesta na e hopi promesanan aki, pasobra di biaha nan ta haya sa, esta conclui cu no por cumpli financieramente cu nan promesa, sigur e promesanan sin base fuerte.
Loke ta concerni e DEBE mes, nos no a tende, cu excepcion di e partido Mep cu un posicion medio/medio, kico politiconan ta bay haci pa baha e debe pa e yega banda di 60% di nos GDP. Pakico 60%? IMF y varios institutonan Economico/Fianciero renombra cualnan ta haci checkeo y ta vigila e situacionnan financiero y tambe di e debenan nacional di hopi paisnan na mundo semper a spierta pa e debenan nacional di tur pais, no surpasa 60% di nos G.D.P..
Pues loke ta e debe di banda di 6 biyon florin, cual ta mas cu 95% di nos GDP y cu nos tin cu paga bek, aserca interesnan halto cu mester ser paga tambe, den e campaña electoral aki no a sali mucho informacion, casi nada.
6.2. Debe haltisimo dor di mal gobernacion 2010 – 2017.
Awor con nos a yega na un debe haltisimo , ta un asunto cu tur Arubiano mester por sa
Mi a scirbi con nos debenan a cuminsa cu entrada di Status Aparte y despues subi y stabilisa banda di 40% di GDP.
Na 2010 nos debenan nacional tabata banda di 40% y despues di gobernacion di Mike Eman na 2017, apoya pa M. de Meza, Douwers, Sneek, Whyatt-Ras, tur awe den AVP, tambe cu e apoyo di Marisol Tromp, Otmar Oduber, lidernan di otro partidonan awe, e debenan a surpasa 80% di nos GDP. Pues nos debenan a subi barabaramente cu pasonan grandi y a bira dobbel di e 40% di GDP cu tabata existi y yega na mas di 80% di GDP.
Aserca tabatin tabatin un desaster serca trahadornan den sector publico, dor di falta di ahustacion di salario pa subimento di costo di Bida, aserca e areglo di pensioen a bira pio dor di hisa e Franchise. A cambia e Gelijkbedrag y Bashi Premie pa solamente 10 aña, pues nan ta wordo elimina entrante 2025. Trahadornan di Fundacionnan cu tabatin un Subsidiale Regeling pa loke ta indexering y otro areglonan, pa nan wordo trata igual na e Empleado Publico, tur a ser elimina.
Tur esakinan a sosode dor di deficitnan grandi di varios aña, cualnan tabata suma 300 miyon florin, otro añanan cu deficitnan di 400 miyon florin. Aserca e proyectonan PPP. Pues tabatin un mal-gastamento di placa, bo por bisa “PA LOCO” sigur pa hopi hende tabata e Gobernacion mas malo den historia di Aruba. .
Mi ta di opinion cu nos pueblo e dianan aki mester por demonstra cu nan tin MEMORIA y no laga e politiconan menciona prome, bolbe y atrobe haci y deshaci cu nos gobernacion.
Propiamente dicho, a lo menos nan cu a goberna malo mester a bisa pueblo, “Mea Culpa” pero awor nos ta bay haci mihor. Pero nos no a tende esey.
Pueblo mester siña su les y no ripiti cosnan malo.
6.3. Lucha sindical e mihor school pa e futuro politico.
Un otro observacion cu mi ta haci ta, tocante varios politiconan hoben, kendenan a subi lista pa den futuro nan ta bira lidernan politico respeta. Nos por wak cu nan ta inteligente, tin briyo y sigur nan ta mustra balente, pero bisto ta e falta di conocimento y experiencia.
Mi conseho na e grupo aki, bay siña y tuma mas aprendisahe pa despues resalta den mundo politico. Pa mi persona e mihor school pa un futuro politico ta e lucha sindical.
Bo ta yuda trahadornan bay dilanti y bo ta forma bo mes ariba terenonan di organisacion, di aspectonan huridico. Bo ta bira profesional ariba con pa dialoga, con pa negocia y mas cu tur bo ta lucha cu bo pueblo pa bay dilanti. Despues di añanan bo tin un carga bunita di experienca cu pueblo, cual sigur lo bay sirbi y haci bo un profesional den e lucha politico.
Tambe e lo ta un ayudo grandi na e lucha di trahadornan, pa yuda engrandece e lucha sindical, cual awendia ta pasando den mal momentonan. Nos falta di lidernan sindical bon prepara y kendenan ta dispuesto pa eleva e lucha di trahadornan.
Sindicato semper tabata dilanti den e peleanan pa un mihor bida di e ser humano. Tambe den e lucha pa e tan anhela igualdad.
Nos mester construi y fortalece e poder di trahadornan. Esaki sigur nos por logra atraves di sindicatonan fuerte, democratico y cu ta hinca nan mes den politica nacional na defensa di trahadornan.
Trahadornan ta importante pa nos sociedad funciona correctamente.
6.4. Final, vota conciente.
Ta mi deseo cu parti grandi di pueblo ta bay vota. E ta un derecho cu tur tin den un pais democratico. Pues bay vota.
Ta mi deseo tambe cu tur hende ta vota consientemente a base di un escohencia correcto, sin menasa y sin cumpramento di voto.
Tambe pa e mihor partidonan saca nan asientonan y despues forma un gobierno pa dirigi Aruba for di 2025 pa 2028.
