E asunto aki, nos tabata tende ariba caya, pero e acuerdo ariba esaki, nunca nos a wak.
Awor Valdes dI Oppa cu tabata lider sindical, SIMAR, na 2014/15 temporada cu Gobierno di Mike Eman a trece medidanan contra e empleadonan publico, pa motibo di escases di placa dor di un maneho financiero desastroso.
Mester menciona tambe cu e sostenedornan politico di e Gobierno e tempo ey, tabata de Meza, Douwers, Sievinger, Otmar Oduber, Marisol Tromp y mas. Den mundo sindical tabatin e lidernan complaciente contra e trahador den sector Publico, unda sigur ta inclui Magaly Brito, Valdes y mas. E acuerdo ariba Gelijkbedrag y Bashi Premie di 2014/2015 a wordo scondi pa Empleadonan Publico y Pensioenadonan kendenan a traha den sector publico. Nos por corda con casonan a wordo lanta contra gobierno dor di pensioenadonan pa Gelijkbedrag y Bashi Premie, kendenan a bay cu pensioen despues di 2015. Nan a perde nan casonan.
Sr Valdes ta bisa cu e areglonan a keda limita na un periodo di 10 aña, te na 2024.
Pues a kibra e acuerdonan ariba indexering, cualnan no ta mara na tempo.
Lidernan sindical complaciente na politica anti-sindical a traiciona trahadornan.
E areglonan ariba gelijkbedrag y Bashi-Premie a sali for di e acuerdonan ariba indexering den e final di añanan 90 di siglo pasa. Igualmente pa loke ta e posicion di Trahadornan na Fundacionnan di acuerdo cu e Subsidiale Regeling. Nan no tabata mara na tempo. E lidernan sindical complaciente na Gobierno Eman na 2014 y 2015 a saca e acuerdonan di Indexering di final di siglo pasa y hinca nan hunto cu otro cambionan den e areglo di pensioen di APFA.
Ta nan contra tur regla a mara e acuerdonan ariba Gelijkbedrag y Bashi premie na 10 aña y saca Trahadornan di Fundacionnan for di e acuerdonan ariba indexering.
Nan no a puntra opinion di Trahadornan , ningun reunion a ser yama. Aserca nan a sconde e acuerdonan aki, nan a tapa cos. Mi a puntra hopi otro ambtenaar y ex-ambtenaar, tur ta bisa cu nan no a wak nada.
Den e casonan den corte ta sali cu tin acuerdo entre Gobierno y sindicato.
Trahadornan y Pensioenadonan di sector Publico no ta bay accepta e cambionan pa 2015.
E mensahe pa e proximo gobierno ta pa respeta nos derechonan, logra atreves di lucha.
E Gobierno nobo mester mantene e acuerdonan ariba Indexering di e añanan 90, di final di siglo pasa. Si no, di awor ta bini e advertencia:
Tur Trahadornan den sector publico, uni cu Pensioenadonan kendenan a traha den sector publico, ariba rolstoel o cu baston den man, Nos tur lo ta presente, cla pa lucha y mantene nos DERECHONAN ADKERI VIA LUCHA.
Ta bon pa e lidernan politico, menos esnan cu a apoya tur e badabadanan aki na 2014/2015, bisa nan posicion di awor caba ariba e topiconan aki.
