Siman cu a pasa partidonan politico a presenta nan mes na Pueblo pa eleccion dia 6 december 2024. Partidonan cu a presenta nan lista, mi no a wak nan programa cu nan ideologia, cual ta basa ariba nan politica den e campaña benidero. Pero sigur nan ta basa nan conhunto di ideanan ariba un o mas issue, anto issue= tema o un asunto hopi comenta o cuestiona na e momentonan aki. Otro partido ta elogio loke nan a haci den gobernacion, den pasado lew o pasado serca. Tambe loke nan kier haci e proximo 4 añanan.
Un partido politico ta un organisacion, unda su candidatonan ta bay den eleccion na su pais. Normalmente e miembronan di e partido politico tin igual pensamento ariba politica y e partido politico mester promove un ideologia specifico
Pues ora lidernan presenta nan partido pa participa den eleccion nan mester por propaganda tambe nan conhunto di pensamentonan, esta nan ideologia y na cual tur candidato mester tene nan mes na dje. Esey mi no a mira, ni tende di partidonan.
Aserca bo no ta tende lidernan politico ta papiando di e situacion malisimo pa e trahador na Aruba, cu argumentonan valido pakico e clase trahador mester biba cu e hopi sintomanan= consecuencianan negativo di e poblema grandi cu Aruba ta den, locual ta e desaroyo socio-economico malisimo na Aruba, desde inicio di status aparte te awe.
Esaki mi ta yama husticia social.
E desaroyo socio-economico no ta tene cuenta cu e trahador, pues no ta husto, ni social .
Ta bisto cu un ideologia, esta un conhunto di ideanan na fabor di e clase trahador no ta presente serca e partidonan cu siman pasa a entrega nan listanan, un ideologia pa respalda e trahador, e falta aki ta haci cu e futuro di e trahador na Aruba ta scur. Como luchador social mi posicion semper tabata y ta pa lucha pa e clase trahador.
E desaroyo socio-economico, bo ta wak bek den e indicadornan economico di cada aña.
E prome sintoma of consecuencia di e maneho malo ta, ora nos ta wak dos indicador economico, cualnan ta: uno e canasta familiar=bestaansminimum y dos e salario minimo.
Directamente bo ta wak con malo e desoroyo socio-economico den Status Aparte tabata pa e trahador. Mas malo ainda, ora nos conclui cu e ta un desaroyo cu ta bay di malo pa pio.
Salarionan dia pa dia ta ricibiendo menos balor.
E bestaansminimum ta e suma na placa cu un famia di Mama, Tata y 2 jiu mester tin na su disposicion pa no cay den pobresa
Canasta familiar= Bestaansminimum na fin di augustus 2024 ta F 5.514,= pa luna. E sueldo minimo ta Awg. 1.986,20. Pues e relacion di Sal Min. cu e Canasta familiar ta trece pa fin di augustus, cu Salario minimo ta 36% di e Canasta familiar= Bestaansminimum.
Na 1986, na inicio di Status Aparte e percentaha despues di a calcula e bestaansminimum y bay bek na 1986, esaki tabata alrededor di 70%.
E desaroyo actua ta cu banda di 70 % di trahadornan tin un salario rond di salario minimo.
E percentahe tabata 70% y awor a baha na 36% cual ta UN BAHADA ENORME. Aserca e ta un desaroyo negativo a consecuencia di un desaroyo socio-economico malisimo.
E bahamento barbaro di balor di e salario minimo, ta nifica un degeneracion di e trahador, esta loke cu e ta produci y ricibi bek den su salario dia pa dia su balor ta birando menos.
Esaki no ta ami ta trece dilanti pero ta e indicadornan economico di Aruba ta bisa esaki.
Cu subimento di costo di bida constante y aumento minimal di salario e bahamento ta acelera hopi lihe.
Ora analisa e cifranan aki, e prome pregunta cu tur trahador y lider sindical mester haci na politiconan a base di e politica di husticia social ta:
Con Boso ta bay para e desaroyo negativo aki?
Esta no lage e 36% sigui baha y yega por ehempel na 30% y despues 25% of menos, pa e culmina den un explosion social!!
Despues di añanan cu para e desaroyo economico malo aki, nos mester bay na subi e 36%.
Di dos asunto ta e posicion di pensioenadonan
E pensioenado na Aruba cu tin solamente e areglo di pensioen di SVB ta den un situacion pio compara cu e trahador cu ta gana salario minimo. Su pensioen ta alrededor di 50 pa 55% di e salario minimo. For di e grupo aki di ex-trahadornan constantemente bo ta tende con nan ta reclama, pasobra nan pensioen no ta subi y e costo di bida ta sigui subi y nan calidad di bida ta bahando.
Un opcion cu sigur ta bale la pena pa tur trahador y cual lo bay yuda den futuro tur trahador, ora nan ta pensioenado, ta den man di trahadornan mes. Esta nos ta bay funda fondonan di pensioen den cada sector di nos bida cotidiano. Trahadornan sigur cu ayudo di mundo politico por logra esaki. Prome nan mester organisa nan mes den sindicato cu tin un plan di formacion tanto pa e trahadornan como pa su lidernan.
Pues esaki ta un opcion cu trahadornan por logra, pero nan mester ta bon representa den un sindicato cu lidernan prepara pa haci e trabao di funda fondonan di pensioen den cada sector of un fondo general extra, banda di e fondo di pensioen di SVB. Mi por papia di
practica caba, pues ya e a sosode.
Nos por crea fondonan di Pensioen.
Na inicio di añanan 90 di siglo pasa, Gobierno a cuminsa cu un politica di independisacion di varios departamentonan cu tabata cay bao servicio publico. A crea APA nv y WEB nv. Trahadornan cu tabata empleado publico y kendenan a bay den e nv-nan nobo a mantene nan derecho ariba pensioen den APFA=Fondo di pensioen pa empleadonan publico. Pero e derecho aki no a ser duna na trahadornan nobo den servicio di e nv-nan aki.
Despues di analisa e situacion, mi persona, como presidente di SEPPA e tempo ey, representando e trahadornan di e empresanan aki, despues di a ricibi consehonan di expertonan, a traha un documento amplio cu proposicionnan e.o. pa statutonan di un fondo di pensioen nobo, reglamentonan di e varios formanan di pensioen, calculacionnan pa e sumanan di e pensioennan y tambe primanan cu trahadornan y empleador mester paga. Aserca splicacionan tocante inversionnan y mas asuntonan. Mi a invita tur fundacionnan y nv-nan den sector publico pa inicia e discusionnan. E nomber di fondo cu mi a propone tabata y a keda “FPEF”=Fondo di Pensioen pa trahadornan di Empresanan y Fundacionnan den Sector publico. Nos a cuminsa discusionnan cu hopi fundacion y nv-nan, pero al final ta APA nv y WEB nv so a keda na mesa di discusion. Discusionnan cu a dura mas di un aña. Abogado Martis di Oficina di Abogado Brown y funcionario di KPMG a yuda hopi den e discusionnan, sigur pa loke ta fine-tuning di e statutonan y otro asuntonan fnanciero. Nos a yega na un final hopi bon, unda e dos nvnan a paga tur e gastonan financiero y e fondo a cuminsa draai. Mi mes e prome añanan tabata forma parti di e directiva=hunta di comisariado. Lew-lew, mi ta ricibi bon informacionnan ariba FPEF. FPEF ta sigui ariba un bon caminda.
E di dos pregunta na Politiconan ariba lista di partidonan politico.
Pues nos mes por crea fondonan di pensioen, for di sindicalismo y cu apoyo di mundo politico ta sali proposicionnan cualnan ta bay yega na un bon final.
Esaki ta bale la pena pa ripiti, ya cu awe e pensioen di biehes di SVB maximalmente ta yega te banda di 50% di e suma di Salario Minimo. E fondo di pensioen ta pa e trahador mantene su mes sin cay den pobresa, ora e stop di traha.
Pues nos ta na crusada di un caminda:
Esta opcion 1, nos ta keda ariba e caminda malo, unda e calidad di bida di e trahador y despues ora e ta pensioenado, ta bay ta di malo pa pio.
O, opcion 2, nos mes ta busca un solucion, cual ta un segundo pensioen pa tur trahador.
Algun sector tin areglonan bon, otronan menos bon, manera nos por a tende y lesa poco aña pasa di pensioenadonan=ex-trahadornan di Hospital. Pero toch nan ta miho para compara cu Pensioenadonan cu ta biba solamente di e Pensioen d SVB.
E caminda pa trahadornan tin un segundo fondo di pensioen ta mustra lew, pero nos no por keda warda te ora miseria bati na nos porta.
Pues esaki mester ta di dos pregunta di tur lider sindical y di tur trahador na cada politico den e campaña electoral aki:
BO TA DI ACUERDO CU OPCION 2 PA CREA FONDONAN DI PENSIOEN?
Pa e pensioenadonan cu awe tin solamente un areglo di pensioen, gobierno mester percura pa un entrada adicional pa e no cay den pobresa. Gobierno su presupuesto tin un surplus, cual ta haci e solucion factibel. Gobierno sigur tin expertonan, kendenan por traha un bon ley pa e fase transitorio te ora tur pensioenado tin su di dos areglo di pensioen.
Ami ta kere den desaroyo y for di mundo politico mester por yuda crea un desaroyo economico a base di Husticia Social na fabor di e clase trahador.
Trahadornan y Mundo Sindical mester lucha pa e cambionan na fabor di trahadornan.
Asuntonan clave cu nos mester enfrenta y drecha cos pa nos bay dilanti den un desroyo nobo na fabor di e clase trahador ta lo siguiente:
Ban hiza e nivel di Lucha sindical na Aruba cu inyeccionnan financiero grandi den formacion, unda gobernacion tambe mester participa;
Donder op Lidernanan sindical cu pa añanan a demonstra poco conocimento pa mehora e lucha di trahador. “A leader with little Knowledge is very dangerous for the workers”.
Igualmente e lidernan dictador, anti-democratico kendenan a keda 10, 11, 15 aña sin tene eleccion.
Cambia e mentalidad di Dunadornan di trabao pa nan gasta mas placa na fabor di nan trahadornan, di e forma aki e trahador lo bay duna mas produccion.
Asina tambe nos ta bay eleva drasticamente e grado di representacion sindical serca trahadornan y drecha e nivel di bida di Trahadornan;
Pues ban ta positivo, ban spera cu mundo politico lo bay para hunto cu trahadornan den nan lucha pa mehoransa di trahadornan.
Asina Trahadornan y mundo politico ta crusa e caminda, pa un bida miho pa nos tur.
